កូនស្រីពៅសម្តេចតេជោ ដឹកនាំក្រុមការងារកម្មវិធីផ្ទះទេវតា ចុះប្រគល់ផ្ទះ៤ខ្នង ជូនទុរគតជន ចាស់ជរាគ្មានទីពឹង នៅក្នុងស្រុកស្រីសន្ធរ ខេត្តកំពងចាម
07-12-2017 16:52
(កំពង់ចាម)៖ នៅព្រឹកថ្ងៃទី០៧ ខែធ្នូ ឆ្នាំ២០១៧នេះ លោកស្រី ហ៊ុន ម៉ាលី កូនស្រីពៅរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានដឹកនាំក្រុមការងារកម្មវិធីផ្ទះទេវតា ចុះប្រគល់ផ្ទះចំនួន០៤ខ្នងជូនទុរគតជន ចាស់ជរាគ្មានទីពឹងនៅក្នុងស្រុក ស្រីសន្ធរ ខេត្តកំពងចាម។
ក្នុងឱកាសនោះលោកស្រី បាននាំយកការផ្តាំផ្ញើសាកសួរសុខទុក្ខពី សំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលសម្តេចទាំងទ្វេ តែងគិតគូរអំពីសុខទុក្ខដល់ ប្រជាពលរដ្ឋគ្រប់ទីកន្លែង។
អំណោយផ្ទះទេវតា ដែលត្រូវប្រគល់ជូនទុរគតជន ចាស់ជរាគ្មានទីពឹងនៅពេលនេះគឺ៖
១៖ ផ្ទះលេខ២៣០ ប្រគល់ជូនលោកយាយ ជាង ប៉ោង អាយុ៧១ឆ្នាំ រស់នៅភូមិស្វាយម៉ូ ឃុំព្រែកដំបូក ស្រុកស្រីសន្ធរ ខេត្តកំពង់ចាម។
២៖ ផ្ទះលេខ២៣៦ ប្រគល់ជូនលោកយាយ ចឹក ប៉ូល អាយុ៧៨ឆ្នាំ រស់នៅភូមិតាមឿន ឃុំព្រែកដំបូក ស្រុស្រីសន្ធរ ខេត្តកំពង់ចាម។
៣៖ ផ្ទះលេខ២៣៧ លោកតា សុខ សឿន អាយុ៧៥ឆ្នាំ រស់នៅភូមិបន្ទាយ ឃុំបារាយ ស្រុកស្រីសន្ធរ ខេត្តកំពង់ចាម។
៤៖ ផ្ទះលេខ២៦៨ ប្រគល់ជូនលោកតា លន់ អ៊ីម អាយុ៨៦ឆ្នាំ រស់នៅភូមិព្រែករំដេង ឃុំព្រែករំដែង ស្រុកស្រីសន្ធរ ខេត្តកំពង់ចាម។
អំណោយផ្ទះទេវតាទាំង០៤ខ្នងខាងលើនេះ ជាអំណោយសប្បុរសធម៌របស់លោកឧកញ៉ា ថៃ ជាហួត និងលោកស្រី (ក្រុមហ៊ុន ប៉េង ហួត)។ សូមបញ្ជាក់ថា ទុរគតជនដែលទទួលបានផ្ទះនីមួយៗ ក៏ទទួលបានអំណោយមនុស្សធម៌ពី សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត មួយចំនួនធំ។
ក្នុងឱកាសនោះក្រុមការងារ បានផ្តល់អំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនដល់បងប្អូនប្រជាពលរដ្ឋ និងសិស្សានុសិស្ស ដែលបានមកចូលរួមអបអរសាទរក្នុងពិធីនោះរួមមាន៖ សម្ភារប្រើប្រាស់ សម្ភារសិក្សាសម្រាប់សិស្សានុសិស្ស និងថវិកាមួយចំនួនផងដែរ៕
