(ភ្នំពេញ)៖ កម្លាំងគយចល័ត​បានបើកប្រតិបត្តិការចាប់​​រថយន្ត​​ទំនើបៗអត់ពន្ធ​៧គ្រឿង នៅភូមិសាស្រ្តតាមបណ្តាខណ្ឌនានា ក្នុងរាជធានីភ្នំពេញ ដោយសហការជាមួយកម្លាំងកងរាជអាវុធហត្ថលើផ្ទៃប្រទេស និងកម្លាំងអង្គភាពតម្រួតបទបញ្ជា នៃអគ្គស្នងការនគរបាលជាតិ។

​លោក ព្រាប គារ៉ាត់ មន្រ្តីគយ​ចល័ត ថ្លែងប្រាប់បណ្តាញព័ត៌មាន Fresh Newsថា ប្រតិបត្តិការបង្ក្រាបនេះ ធ្វើឡើងនៅរយៈពេល២ថ្ងៃ ពោលថ្ងៃទី១១ និងថ្ងៃទី១២ ខែកក្កដា ឆ្នាំ២០១៧នេះ ដោយចាប់បានចំនួន៧គ្រឿង។ ការបង្រ្កាបរថយន្តអត់​ពន្ធពីសំណាក់កម្លាំង​គយចល័ត នឹងត្រូវធ្វើ​ឡើងជាប់ជានិច្ចដូចភ្លៀងរលឹម ពោលគឺបន្តបង្ក្រាបឲ្យតែប្រើប្រាស់រថយន្តអត់ពន្ធ និងស្លាកលេខក្លែងក្លាយ។​

កម្លាំងគយចល័ត បានចុះប្រតិបត្តិ ចាប់ថយន្តស៊េរីទំនើបៗ ដែលអត់ពន្ធជាច្រើនគ្រឿងរួចមកហើយ កាលពីពេលកន្លងមក ហើយប្រត្តិបត្តិការនេះ ក៏ទទួលបានជោគជ័យជាបន្ត​បន្ទាប់​ផងដែរ៕