(ភ្នំពេញ)៖ ក្រុមប្រឹក្សាអភិវឌ្ឍន៍កម្ពុជា ដែលជាសេនាធិការលើការងារវិនិយោគ​របស់​រាជ​រដ្ឋា​ភិបាល ប្រកាសការដាក់ឱ្យប្រើប្រាស់ហត្ថលេខាអេឡិចត្រូនិក (e-Sign​atu​r​e) និងត្រាអេឡិចត្រូនិក (e-Stamp) លើឯកសារទម្រង់ឌីជីថល​ចេញពី​ប្រព័ន្ធ​គ្រប់​គ្រង​​​គម្រោង​វិនិយោគកម្ពុជា (ប្រព័ន្ធ cdcIPM)។ ការដាក់ឱ្យប្រើ​ប្រាស់ហត្ថលេខា​អេ​ឡិចត្រូនិក និងត្រាអេឡិចត្រូនិកនេះ នឹងជួយសម្រួលអ្នកវិនិយោគក្នុងការដាក់​ឯក​សារ​នានា ក្នុងការស្នើសុំសិទ្ធិវិនិយោគ។

ប្រព័ន្ធគ្រប់គ្រងគម្រោងវិនិយោគកម្ពុជា cdcIPM ត្រូវបានដាក់ឱ្យប្រើប្រាស់ជាផ្លូវការ​ជាងមួយឆមាសហើយ សម្រាប់ការ ផ្តល់សេវាចុះបញ្ជីគម្រោងវិនិយោគ​មានលក្ខណៈ​សម្បត្តិគ្រប់គ្រាន់ (QIP)។ ការដាក់ចេញនូវយន្តការបច្ចេកវិទ្យាឌីជីថលនេះ ស្របតាម​យុទ្ធសាស្ត្របញ្ចកោណ-ដំណាក់កាលទី១ ដើម្បីចូលរួមជំរុញការធ្វើបរិវត្តកម្មឌីជីថល កសាងម៉ូដែលថ្មីនៃកំណើន សំដៅពន្លឿននីតិវិធី កាត់បន្ថយ ពេលវេលាផ្តល់​សេវាសា​ធា​រណៈ និងបង្កើនទំនុកចិត្តជូនវិនិយោគិនដែលមានបំណងមកបណ្តាក់ទុនវិនិយោគ នៅកម្ពុជា។

ដោយទទួលបានការអនុញ្ញាតពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជា និងជាប្រធានក្រុមប្រឹក្សាអភិវឌ្ឍន៍កម្ពុជា នៅពេលនេះក្រុមប្រឹក្សាអភិវឌ្ឍន៍​កម្ពុជា បានកំណត់ឱ្យប្រើប្រាស់ហត្ថ​លេ​ខា​​អេឡិចត្រូនិក និងត្រាអេឡិចត្រូនិក ដោយ​មានភា្ជប់ QR Code ទៅដែនជាតិ .gov.kh ដើម្បីផ្ទៀងផ្ទាត់។ រាល់ឯកសារ​ទម្រង់​ឌី​ជី​ថល ដែលមានកាលបរិច្ឆេទចាប់ពីថ្ងៃចុះហត្ថលេខានេះតទៅ អាចត្រូវបានទាញ​យក​ពីប្រព័ន្ធ cdcIPM ទៅប្រើប្រាស់ និងមានតម្លៃជាឯកសារ​ច្បាប់​ដើម ដោយអនុលោម​ទៅ​​តាមច្បាប់និងបទប្បញ្ញត្តិពាក់ព័ន្ធជាធរមាន។

តាមរយៈការដាក់ឱ្យប្រើប្រាស់ហត្ថលេខាអេឡិចត្រូនិក និងត្រាអេឡិចត្រូនិក នឹងបង្ក​ភាពងាយស្រួលសម្រាប់អ្នកវិនិយោគក្នុងការដាក់ឯកសារស្នើសុំការវិនិយោគ។ អ្នក​ដាក់ពាក្យស្នើសុំ ឬវិនិ​យោគិន​ដែលអនុវត្តគម្រោងវិនិយោគ មិនតម្រូវ​ឱ្យ​ផ្តល់ឯកសារ​នានា​​ដែលមាន​ស្រាប់​នៅក្នុង QR Code នៃឯកសារទម្រង់ឌីជីថលខាងលើនេះ ទៅ​ក្រសួង ស្ថាប័ន រដ្ឋ​បាលរាជធានី ខេត្ត មន្ទីរ និងអង្គភាពដែលពាក់ព័ន្ធ​នឹងការចុះ​បញ្ជី​ពាក់ព័ន្ធ និងការពិនិត្យអនុលោមភាពនៃការអនុវត្តគម្រោង វិនិយោគ​សោះ​ឡើយ។

រយៈពេលមិនដល់ពីរឆ្នាំនៃរាជរដ្ឋាភិបាលនីតិកាលថ្មី ក្រុមប្រឹក្សាអភិវឌ្ឍន៍​កម្ពុជា ដែល​ជាសេនាធិការ​លើការងារវិនិយោគរបស់រាជរដ្ឋាភិបាល មានលោកឧបនាយករដ្ឋមន្ត្រី ស៊ុន ចាន់ថុល ជាអនុប្រធានដឹកនាំប្រតិបត្តិផ្ទាល់ បានប្រឹងប្រែងធ្វើនវានុវត្តន៍​ប្រព័ន្ធ​ឌីជីថុលលើការងារផ្តល់សេវាផ្នែកវិនិយោគ ដើម្បីជួយសម្រួល និងកាត់​បន្ថយ​ភាព​ស្មុគ​ស្មាញលើការស្នើសុំវិនិយោគនៅកម្ពុជា។

ឆ្នាំ២០២៤ ប្រព័ន្ធ​គ្រប់​គ្រង​​​គម្រោង​វិនិយោគកម្ពុជា cdcIPM ត្រូវបានប្រកាសដាក់ឱ្យ​ប្រើ​ប្រាស់ ហើយត្រូវបានធ្វើបច្ចុប្បន្នភាពប្រព័ន្ធជាបន្តបន្ទាប់ រហូតឈានដល់ការដាក់​ឱ្យ​ប្រើប្រាស់ហត្ថលេខាអេឡិចត្រូនិក និងត្រាអេឡិចត្រូនិក បង្កភាពកាន់តែងាយ​ស្រួលសម្រាប់ការដាក់ពាក្យស្នើសុំសិទ្ធិវិនិយោគ។

ប្រព័ន្ធ​គ្រប់​គ្រង​​​គម្រោង​វិនិយោគកម្ពុជា cdcIPM ជួយឱ្យអ្នកវិនិយោគដាក់ពាក្យស្នើ​សុំ​សិទ្ធិវិនិយោគនៅកម្ពុជា គ្រប់ទីកន្លែងដែលមានអ៊ីនធើណេត គេមិនបាច់វេច​ឯក​សារ​មកកាន់ក្រុមប្រឹក្សាអភិវឌ្ឍន៍កម្ពុជាទៀតនោះឡើយ។ ប្រព័ន្ធនេះ ក៏ជួយឱ្យថ្នាក់​ដឹក​នាំក្រុមប្រឹក្សាអភិវឌ្ឍន៍កម្ពុជា ពិនិត្យ និងតាមដាន ហើយឈានទៅអនុម័ត​លើ​គម្រោងវិនិយោគនានាពីគ្រប់ទីកន្លែង សូម្បីតែលោកឧបនាយករដ្ឋមន្ត្រី ស៊ុន ចាន់​ថុល ជាប់បំពេញភារកិច្ចនៅក្រៅប្រទេស ក៏អាចពិនិត្យ និងសម្រេចលើគម្រោង​វិនិ​យោគនានាបានផងដែរ៕