(ព្រះវិហារ)៖ ថ្មីៗនេះក្រុមចល័តរបស់អ្នកឧកញ៉ា ឡេង ណាវ៉ាត្រា ប្រធានសហព័ន្ធយុវជនបូជាការពារយុត្តិធម៌ បានមកប្រគល់គ្រឿងឧបភោគបរិភោគ និងថវិកាជូនវីរៈកងទ័ពជួរមុខ ដែលកំពុងឈរជើងនៅទិសទី៣ ប្រាសាទតាមាន់ និងប្រាសាទតាក្របី ខេត្តឧត្តរមានជ័យ។

ក្រុមការងារសហព័ន្ធយុវជនបូជាការពារយុត្តិធម៌ បានទៅដល់ទីតាំងកងទ័ពឈរជើងនៅទិសទី៣ ផ្តល់កម្លាំងចិត្តកងទ័ពជួរមុខ ដែលកំពុងឈរជើងការពារយ៉ាងរឹងមាំនៅសមរភូមិមុខ ដើម្បីបុព្វហេតុការពារ អធិបតេយ្យជាតិ បូរណភាពដែនដី និងសុខសន្តិភាព ជូនជាតិមាតុភូមិ និងប្រជាពលរដ្ឋ។ សម្ភារៈនិងគ្រឿងឧបភោគបរិភោគរបស់ក្រុមការងារ ប្រគល់ជូនវីរៈកងទ័ព រួមមាន ភេសជ្ជៈ, ទឹកបរិសុទ្ធ, មីជាតិ, ទឹកត្រី, ទឹកស៊ីអ៉ីវ, ត្រីងៀត, ស្ករប៊ីចេង, ខ្ទឹមសរ, សាប៉ូ, ធូបមូស និងសម្ភារៈមួយចំនួនទៀត។

ការចុះដល់សមរភូមិផ្ទាល់របស់ក្រុមការងារ ធ្វើឡើងតាមអនុសាសន៍ណែនាំរបស់អ្នកឧកញ៉ា ឡេង ណាវ៉ាត្រា ប្រធានសហព័ន្ធយុវជនបូជាការពារយុត្តិធម៌ ដែលអ្នកឧកញ៉ាតែងតែបានគិតគូរ និងបង្ហាញនូវការគោរពស្រឡាញ់ដល់ទឹកចិត្ត និងវីរភាពរបស់បងៗកងកម្លាំងការពារជាតិរបស់យើង គាំទ្រកងទ័ពជួរមុខកម្ពុជាដ៏អង់អាច ក្នុងន័យបង្ហាញពីខឿនការពារជាតិ៕