សហប្រតិបត្តិការរវាងក្រសួងអប់រំ និងកយកា ជួយពង្រឹងសមត្ថភាពបច្ចេកវិទ្យាព័ត៌មាន និងគមនាគមន៍នៅកម្ពុជា
17-07-2025 20:01
(ភ្នំពេញ)៖ ពិព័រណ៍បច្ចេកវិទ្យាព័ត៌មាន និងសារគមនាគមន៍ ត្រូវបានប្រារព្ធឡើងនាថ្ងៃព្រហស្បតិ៍ ទី១៧ ខែកក្កដា ឆ្នាំ២០២៥នេះ នៅសាលមជ្ឈមណ្ឌលគរុកោសល្យភូមិភាគខេត្តកណ្តាល ដើម្បីអបអរសាទរសមិទ្ធផលនៃវិស័យអប់រំបច្ចេកវិទ្យាព័ត៌មាន និងគមនាគមន៍ ដែលកំពុងរីកចម្រើននៅកម្ពុជា។
មហោស្រពនេះបានប្រមូលផ្តុំសិស្សចំនួន ១០០នាក់ មកពីសាលាឈានមុខផ្នែកបច្ចេកវិទ្យាព័ត៌មាន និងគមនាគមន៍នៅទូទាំងប្រទេស និងគ្រូបង្រៀនមុខវិជ្ជាបច្ចេកវិទ្យាព័ត៌មាន និងគមនាគមន៍ចំនួន ២០នាក់ ដែលបានចូលរួមក្នុងការប្រកួតប្រជែងបច្ចេកវិទ្យាព័ត៌មាន និងសារគមនាគមន៍ និងការចែករំលែកការអនុវត្តល្អៗ។
ពិព័រណ៍នេះបានរៀបចំឡើងដោយក្រសួងអប់រំ យុវជន និងកីឡា និង KOICA ក្នុងគោលបំណងលើកទឹកចិត្តសិស្ស អ្នកអប់រំ និងភាគីពាក់ព័ន្ធសំខាន់ៗដើម្បីជំរុញការរីកចម្រើនបច្ចេកវិទ្យាព័ត៌មាន និងសារគមនាគមន៍នៅតាមសាលារៀន។
ព្រឹត្តិការណ៍នេះ មានការប្រកួតបច្ចេកវិទ្យាព័ត៌មាន និងសារគមនាគមន៍ដែលសិស្សបានបង្ហាញជំនាញឌីជីថលរបស់ពួកគេ និងការបង្ហាញពីការអនុវត្តន៍បង្រៀនប្រកបដោយប្រសិទ្ធភាពដោយគ្រូមុខវិជ្ជាបច្ចេកវិទ្យាព័ត៌មាន និងសារគមនាគមន៍។
ជាការកត់សម្គាល់ សិស្សានុសិស្សបានឆ្លើយតបយ៉ាងសាទរចំពោះកម្មវិធីអប់រំកូដកម្រិតខ្ពស់ដែលផ្តល់ដោយនាយកដ្ឋានបច្ចេកវិទ្យាឌីជីថលរបស់ក្រសួងអប់រំ យុវជន និងកីឡា។ នៅក្នុងពិធីបិទ អមដោយវត្តមានរបស់លោកបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា និងលោកស្រី Moonjung Choi នាយិកា KOICA ប្រចាំប្រទេសកម្ពុជា បានរួមគ្នាមកផ្តល់រង្វាន់ដល់សិស្សានុសិស្ស និងគ្រូបង្រៀនឆ្នើម ដើម្បីលើកទឹកចិត្តអ្នកចូលរួមទាំងអស់ឱ្យបន្តការរៀនសូត្រ និងការបង្រៀនមុខវិជ្ជាបច្ចេកវិទ្យាព័ត៌មាន និងសារគមនាគមន៍របស់ពួកគេ។
ពិព័រណ៍នេះជាចំណុចសំខាន់មួយនៅក្នុងគម្រោងការពង្រឹងសមត្ថភាពបច្ចេកវិទ្យាព័ត៌មាន និងសារគមនាគមន៍អោយកាន់តែទូលំទូលាយ ក្រោមការអនុវត្តរួមគ្នារវាង KOICA និងក្រសួងអប់រំ យុវជន និងកីឡា។ ចាប់តាំងពីការចាប់ផ្តើមគម្រោងនៅឆ្នាំ ២០២១មក គម្រោងនេះបានរួមចំណែកយ៉ាងសំខាន់ក្នុងការលើកកម្ពស់ការអប់រំឌីជីថលនៅទូទាំងប្រទេស។ រហូតមកដល់បច្ចុប្បន្ន គម្រោងនេះបានបង្កើតបរិយាកាសសិក្សាឌីជីថល ដែលកាន់តែមានភាពសកម្ម និងបរិយាប័ន្នតាមរយៈការបង្កើតបន្ទប់ ICT នៅមជ្ឈមណ្ឌលគរុកោសល្យភូមិភាគទាំង៤ និងសាលាឈានមុខបច្ចេកវិទ្យាព័ត៌មាន និងសារគមនាគមន៍ចំនួន២០។
សមិទ្ធផលសំខាន់ផ្សេងទៀតរបស់គម្រោងនេះ គឺការបណ្តុះបណ្តាលគ្រូឧទ្ទេស ដែលបច្ចុប្បន្នពួកគាត់កំពុងដឹកនាំការរៀន និងបង្រៀនមុខវិជ្ជាបច្ចេកវិទ្យាព័ត៌មាន និងសារគមនាគមន៍នៅទូទាំងប្រទេស។ គួរឱ្យចាប់អារម្មណ៍ផងដែរ គឺលោកគ្រូ អ្នកគ្រូទាំងអស់គ្នានេះ ជាអ្នកបង្កើតសៀវភៅសិក្សាបច្ចេកវិទ្យាព័ត៌មាន និងសារគមនាគមន៍ចំនួន ៩មុខវិជ្ជាដោយខ្លួនពួកគាត់ ហើយសៀវភៅទាំងនេះបានអនុម័តជាផ្លូវការដោយក្រសួងអប់រំ យុវជន និងកីឡា។
គម្រោងនេះក៏បន្តគាំទ្រដល់ការអភិវឌ្ឍវិជ្ជាជីវៈជាប្រចាំដល់គ្រូឧទ្ទេសនិងគ្រូបង្រៀនមុខវិជ្ជាបច្ចេកវិទ្យាព័ត៌មាន និងសារគមនាគមន៍នៅសាលារៀនផងដែល។ នៅសប្តាហ៍ខាងមុខនេះ សិក្ខាសាលាបណ្តុះបណ្តាលការអភិវឌ្ឍវិជ្ជាជីវៈជាប្រចាំ នឹងត្រូវធ្វើឡើងនៅរាជធានីភ្នំពេញចាប់ពីថ្ងៃទី ២១-២៥ ខែកក្កដា ឆ្នាំ ២០២៥ ដោយប្រមូលផ្តុំគ្រូឧទ្ទេសចំនួន ២៣ នាក់មកពីមជ្ឈមណ្ឌលគរុកោសល្យភូមិភាគខេត្តទាំងបួន និងវិទ្យាស្ថានគរុកោសល្យ ព្រមទាំងមន្ត្រីក្រសួងអប់រំ យុវជន និងកីឡាប្រមាណ ១០នាក់។
សិក្ខាសាលាបណ្តុះបណ្តាលការអភិវឌ្ឍវិជ្ជាជីវៈជាប្រចាំ លើកទីបីនេះ នឹងពង្រឹងបន្ថែមជំនាញបច្ចេកវិទ្យាព័ត៌មាន និងសារគមនាគមន៍ និងគរុកោសល្យក្នុងចំណោមបុគ្គលិកអប់រំសំខាន់ៗ ដើម្បីធានាការរីកចម្រើនប្រកបដោយនិរន្តរភាពនៃការអប់រំបច្ចេកវិទ្យាព័ត៌មាន និងសារគមនាគមន៍ ដែលមានគុណភាពនៅទូទាំងប្រទេសកម្ពុជា។
លោកស្រី Moonjung Choi នាយិកា KOICA ប្រចាំប្រទេសកម្ពុជា បានមានប្រសាសន៍ថា KOICA ពិតជាមានមោទនភាពយ៉ាងខ្លាំងដែលបានចាប់ដៃគូជាមួយក្រសួងអប់រំ យុវជន និងកីឡា លើគម្រោងដ៏សំខាន់នេះ។ ការសាទរ និងទេពកោសល្យដែលបានបង្ហាញនៅក្នុងពិព័រណ៍បច្ចេកវិទ្យាព័ត៌មាន និងសារគមនាគមន៍ រួមជាមួយនឹងការប្តេជ្ញាចិត្តដែលឃើញនៅក្នុងសិក្ខាសាលាអភិវឌ្ឍន៍វិជ្ជាជីវៈជាប្រចាំនេះ ពិតជាបានគូសបញ្ជាក់ពីសក្តានុពលរបស់កម្ពុជានៅក្នុងយុគសម័យឌីជីថល។
លោកស្រី បានបញ្ជាក់ថា «យើងប្តេជ្ញាគាំទ្រការរីកចម្រើនប្រកបដោយនិរន្តរភាពនៃការអប់រំបច្ចេកវិទ្យាព័ត៌មាន និងសារគមនាគមន៍ ដើម្បីផ្តល់ឱកាសដល់ទាំងសិស្សានុសិស្ស និងលោកគ្រូ អ្នកគ្រូសម្រាប់អនាគតដ៏ភ្លឺស្វាង»។
លោកបណ្ឌិតសភាចារ្យ ហង់ ជួនណារ៉ុន បានមានប្រសាសន៍ថា ពិព័រណ៍បច្ចេកវិទ្យាព័ត៌មាន និងសារគមនាគមន៍ ព្រមទាំងសិក្ខាសាលាអភិវឌ្ឍន៍វិជ្ជាជីវៈជាប្រចាំនេះ គឺជាសក្ខីភាពនៃការប្តេជ្ញាចិត្តដ៏មុតមាំរបស់យើងក្នុងការលើកកម្ពស់ការអប់រំបច្ចេកវិទ្យាព័ត៌មាន និងសារគមនាគមន៍នៅទូទាំងប្រទេសកម្ពុជា។ ការបានឃើញភាពច្នៃប្រឌិត និងការប្តេជ្ញាចិត្តរបស់សិស្សានុសិស្ស និងអ្នកអប់រំវ័យក្មេង ពិតជាជួយក្នុងការជំរុញទឹកចិត្តដល់យើងទាំងអស់គ្នាខ្លាំងណាស់។
លោកឧបនាយករដ្ឋមន្ត្រីបន្ថែមថា គំនិតផ្តួចផ្តើមទាំងនេះមានសារៈសំខាន់ណាស់សម្រាប់ការបំពាក់ជំនាញសំខាន់ៗសម្រាប់សតវត្សរ៍ទី២១ ដល់សិស្សានុសិស្ស ក៏ដូចជាធានាថាគ្រូបង្រៀនរបស់យើងនៅតែឈានមុខគេក្នុងឧត្តមភាពអប់រំ៕
