(កូរ៉េខាងត្បូង)៖ លោក ឡុង ឌីម៉ង់ ឯកអគ្គរាជទូតកម្ពុជា ប្រចាំនៅកូរ៉េខាងត្បូង និងក្រុមការងារ បានជួបសំណេះសំណាល និងពិសារអាហារសាមគ្គី ជាមួយក្រុមស្រ្តីខ្មែររៀបការស្វាមីកូរ៉េ នៅទីក្រុងNonsan ខេត្តChungcheongnam ប្រមាណ ៣០គ្រួសារ នៅភោជនីយដ្ឋានខ្មែរ នូនសាន ក្នុងប្រទេសកូរ៉េខាងត្បូង ដើម្បីស្វែងយល់ពី សុខទុក្ខ កង្វល់ បញ្ហាប្រឈម និងជួយដោះស្រាយ នូវសំណូមពរមួយចំនួនទៀត កាលពីចុងសប្តាហ៍មុននេះ។

នៅក្នុងឱកាសនោះ លោក ឡុង ឌីម៉ង់ ឯកអគ្គរាជទូតបានលើកឡើងឲ្យដឹងថា ក្រុមការងារស្ថានទូត បច្ចុប្បន្នបានដើរតួនាទីជាគ្រូពេទ្យពិនិត្យ និងព្យាបាល ឬជាអ្នកត្រួតពិនិត្យបច្ចេកទេសយានយន្ដ ដែលត្រូវតែតាមដាន សិក្សានូវស្ថានភាពនៃជម្ងឺ ហើយស្វែងរកដំណោះស្រាយ និងផ្ដល់សេវាគាំពារ ជាប្រចាំជូនប្រជាពលរដ្ឋខ្មែរ ដែលកំពុងរស់នៅធ្វើការ និងសិក្សា នៅសាធារណរដ្ឋកូរ៉េ ។

គួរបញ្ជាក់ផងដែរថា បច្ចុប្បន្ននេះស្រ្តីខ្មែរដែលបានរៀបការស្វាមីកូរ៉េមានចំនួនប្រមាណជាង ១ម៉ឺននាក់ ដែលក្រុមការងារស្ថានទូត កំពុងចងក្រងរៀបចំ ជាសហគមន៍ខ្មែរតូចៗ នៅតាមតំបន់នៃសាធារណរដ្ឋកូរ៉េ ដើម្បី ងាយស្រួល ក្នុងការប្រាស្រ័យទំនាក់ទំនងទៅមកស្ថានទូត និងសហគមន៍។

បន្ថែមពីនេះក្រុមគ្រួសារទាំងនោះ បាននឹងកំពុងបង្កើតមនុស្សជំនាន់ថ្មី ដែលមានជាប់ឈាមជ័រជាខ្មែរ ជាមធ្យមមួយគ្រួសារមានកូនពីរនាក់ ដែលទាំងនេះ គឺជាអទិភាពដែលស្ថានទូតបាន នឹងកំពុងយកចិត្តទុកដាក់ និងស្វែងរកវិធីសាស្រ្តដោះស្រាយ។

បច្ចុប្បន្ននេះ ស្ថានឯកអគ្គរាជទូតកម្ពុជា កំពុងចងក្រង រៀបចំស្រ្តីខ្មែរ ដែលបានរៀបការស្វាមីកូរ៉េ ជាសហគមន៍ខ្មែរតូចៗ នៅតាមតំបន់នៃសាធារណរដ្ឋកូរ៉េ ដើម្បីងាយស្រួលក្នុងការប្រាស្រ័យទាក់ទង ទៅមករវាង ស្ថានទូត និងសហគមន៍ខ្មែរ តាមតំបន់៕