(ភ្នំពេញ)៖ សាលាឆាន់វត្តមហាមន្ដ្រី ដែលបានស្រុតធ្នឹម កាលពីប៉ុន្មានថ្ងៃមុននេះ ត្រូវបានបាក់ស្រុតជាស្ថាពរហើយ នៅម៉ោងប្រមាណ២រំលងអាធ្រាត្រ ឈានចូលថ្ងៃទី២២ ខែកញ្ញា ឆ្នាំ២០១៦នេះ ប៉ុន្ដែមិនមានអ្នកណាម្នាក់រងគ្រោះថា្នក់នោះទេ។

នៅពេលនេះ ព្រះចៅអធិការវត្ត ព្រះសង្ឃ និង គណៈកម្មការវត្ត កំពុងធ្វើការអំពាវនាវ រកសប្បុរជន ដើម្បីចូលរួមជាថវិកា ក្នុងការកសាងសាលាឆាន់ថ្មីឡើងវិញ។

សូមរំលឹកថា ​កាលព្រឹកថ្ងៃទី១៩ ខែកញ្ញា​កន្លងទៅថ្មីៗនេះ មានករណីភ្ញាក់ផ្អើលមួយ នៅវត្តមហាមន្ដ្រី ដោយសារតែស្រុតធ្នឹម​សាលាឆាន់​ ធ្វើឲ្យផ្អើលអស់ព្រះសង្ឃ តាជីយាយជីនិងពុទ្ធបរិស័ទ នាំគ្នារត់ព្រាត។

​លោក យិន​ សាន អធិការខណ្ឌចំការមន បានបញ្ជាក់ថា ពិតជាមានការហេតុការណ៍នេះ កើតឡើងមែន ប៉ុន្ដែមិនអ្នកណាមានគ្រោះថ្នាក់នោះទេ។ ជាមួយហេតុការណ៍នេះ​ ព្រះចៅអធិការវត្ត​ និងអាជ្ញាធរមូលដ្ឋានបានសម្រេចបិត មិនឲ្យប្រើប្រាស់មួយរយ:សិន៕