(ពោធិ៍សាត់)៖ ក្រុមញៀនល្បែងជល់មាន់ជិត២០នាក់ នាំគ្នារត់ព្រោងព្រាត ខណៈកំពុងលេងល្បែងជល់មាន់ យ៉ាងគគ្រឹកគគ្រេង ហើយត្រូវបានកម្លាំង​អាវុធហត្ថស្រុកបាកាន សហការជាមួយ​កម្លាំង​នគរបាល​ប៉ុស្តិ៍តាលោ ចុះបង្ក្រាបនៅថ្ងៃទី១០ ខែមិថុនា ឆ្នាំ២០១៦ នៅចំណុច​ភូមិព្រៃគោ ឃុំតាលោ ស្រុកបាកាន ខេត្តពោធិ៍សាត់។

លោក នាង វុធ អធិការនគរបាលស្រុកបាកាន បានប្រាប់ភ្នាក់ងារ Fresh News ឲ្យដឹងព្រឹកនេះថា ក្នុងកិច្ចសហការបង្ក្រាបនេះ ជាលទ្ធផលកម្លាំងសមត្ថ​កិច្ចដកហូតបាន មាន់គក២ក្បាល ទ្រុងគ្រុងមាន់២ទ្រុង និងម៉ូតូ៥គ្រឿង។ លោកអធិការបន្តថា ទីតាំងដែលតែងតែលបលួច​លេងល្បែង​ជល់មាន់យ៉ាង​គគ្រឹកគគ្រេង ស្ទើររៀងរាល់ថ្ងៃនេះ កម្លាំងបង្រ្កាបបានតែវត្ថុតាង រីឯក្រុមញៀន​ល្បែងទាំងនោះ បានរត់គេចខ្លួនបាត់ស្រមោល៕