(តូក្យូ)​៖ អ្នកដំណើរប្រមាណ៣០០នាក់ រួមនឹងសហនាវិក ត្រូវបានជម្លៀសចេញពី​ យន្តហោះដឹកអ្នកដំណើររបស់ ក្រុមហ៊ុន អាកាសចរណ៍ Korean Air Lines បន្ទាប់ពី​​មានផ្សែងហ៊ុយចេញពី​ស្លាបខាងឆ្វេងនៃយន្តហោះ មុនពេល​ហោះហើរ នេះបើយោងតាម ការចេញផ្សាយរបស់សារព័ត៌មាន Reuters ចេញផ្សាយនៅប៉ុន្មាននាទីមុននេះ។

មន្ត្រីជាន់ខ្ពស់នៃក្រុមហ៊ុនអាកាសចរណ៍ ​Korean Air Lines បានឲ្យដឹងថា អ្នកដំណើរ និងសហនាវិកទាំងអស់នៅពេលនេះគឺមាន សុវត្ថិភាព បន្ទាប់ពីជម្លៀសចេញពីយន្តហោះដឹកអ្នកដំណើរ នៅអាកាសយាន​ដ្ឋាន Haneda Airport ក្នុងទីក្រុងតូក្យូ។

មន្ត្រីរូបនេះ បានបញ្ជាក់ទៀតថា នៅមុនពេលហោះហើរ គេឃើញមាន​ផ្សែងហ៊ុយចេញពីម៉ាស៊ីនយន្តហោះ នៅ​ស្លាប​ខាង​ឆ្វេង ហើយភ្លាមៗនោះ អ្នកដំណើរ និងសហនាវិកទាំងអស់ត្រូវបានជម្លៀសចេញ ប៉ុន្តែមូលហេតុនោះនៅមិនទាន់ដឹង​នោះទេ៕