(តូក្យូ)៖ រដ្ឋាភិបាលជប៉ុន បានបញ្ជាក់ឲ្យដឹងនៅព្រឹកថ្ងៃនេះថា ជប៉ុននឹងបាញ់កម្ទេចមីស៊ីល របស់​កូរ៉េខាងជើង បើសិនជាការបាញ់សាកល្បងមីស៊ីល របស់កូរ៉េខាងជើង បានគំរាមដល់​​ទឹកដីជប៉ុន នេះបើយោងតាម​ការ​ចេញផ្សាយ របស់សារព័ត៌មាន AFP ចេញផ្សាយនៅមុននេះបន្ដិច។

នៅថ្ងៃអង្គារម្សិលមិញនេះ រដ្ឋាភិបាលជប៉ុនបានបញ្ជាក់ថា ប្រព័ន្ធការពារមីស៊ីលជាង ៣០កន្លែងត្រូវបាន​ដាក់​ពង្រាយ មិនថានៅតាមព្រំដែនគោក និងទឹកនោះទេ ព្រោះដើម្បីការពារ​ និងសុវត្ថិភាព​ ខ្លាចមីស៊ីល​របស់កូរ៉េខាងជើង ឈ្លានពានមកដល់ទឹកដីរបស់ខ្លួន។

ប៉ុន្មានថ្ងៃមុននេះ សារព័ត៌មានជប៉ុន បានចេញផ្សាយថា កូរ៉េខាងជើង បានត្រៀមខ្លួនដើម្បីបាញ់សាកល្បង​មីស៊ីលជាថ្មី នៅកន្លែងឆ្នេរសមុទ្រភាគខាងលិច ប៉ុន្តែមកដល់ពេលនេះ កូរ៉េខាងជើង នៅមិនទាន់បាន​បាញ់​សាកល្បងនោះទេ បែរជា​ប្រកាសថា នឹងបាញ់បង្ហោះផ្ដាយរណប​ នៅក្នុងខែនេះទៅវិញ៕