(ភ្នំពេញ)៖ កម្លាំងនគរបាលប៉ុស្ដិ៍ស្វាយប៉ាក នៃអធិការដ្ឋាននគរបាលខណ្ឌឫស្សីកែវ ឃាត់ខ្លួនជាក់ស្ដែងលើជនសង្ស័យ ចំនួន៣នាក់ រកឃើញថ្នាំញៀនជាកញ្ចប់តូចៗ ចំនួន៣៤កញ្ចប់ ក្នុងបទល្មើសប្រើប្រាស់ និងជួញដូរដោយខុសច្បាប់នូវសារធាតុញៀន។

បើតាមការបញ្ជាក់ឲ្យបានដឹងពីលោកវរសេនីយ៍ទោ គល់ យី អធិការនគរបាលខណ្ឌ ការឃាត់ខ្លួនជាក់ស្ដែងនេះ គឺបានអនុវត្តឡើងស្ថិតនៅត្រង់ចំណុចក្រុមទី៩ ភូមិលូសង្កាត់ ស្វាយប៉ាក ខណ្ឌឫស្សីកែវ នាវេលាម៉ោង០៩៖០០នាទីយប់នៅថ្ងៃទី០៧ ខែមីនា ឆ្នាំ២០១៩។

លោកអធិការខណ្ឌឫស្សីកែវបញ្ជាក់ថា ជនសង្ស័យទាំង៣នាក់ ទី១៖ឈ្មោះ ស្មាស សាហ្វីអី​ អាយុ២៩ឆ្នាំ​​ មានទីលំនៅក្រុមទី៤ ភូមិ៤ សង្កាត់ច្រាំងចំរេះ១ ខណ្ឌឫស្សីកែវ (ជួញដូរ), ទី២៖ឈ្មោះ វិន យ៉ាំងថាន់ ​​អាយុ​៣៦៣ឆ្នាំ​ មានទីលំនៅផ្ទះលេខ៦៩១ ផ្លូវលំ ក្រុមទី៩ ភូមិលូ ​សង្កាត់ស្វាយប៉ាក ខណ្ឌឫស្សីកែវ (ជួញដូរ) និងទី៣៖ឈ្មោះ ហា ណាហ្វី ​អាយុ២៨ឆ្នាំ ​មានទីលំនៅផ្ទះលេខ១៤១៦ ផ្លូវជាតិលេខ៥ ក្រុមទី៦ ភូមិ២ សង្កាត់ច្រាំងចំរេះ១ ខណ្ឌឫស្សីកែវ (ប្រើប្រាស់) ដោយប្រតិបត្តិការនោះដែរ ដកហូតបានក្រាមពណ៌សថ្លា ចំនួន៣៤កញ្ចប់តូចៗ សម្រាប់ធ្វើការជួញដូរ និងដាវកែឆ្នៃ១ដើម ទូរស័ព្ទដៃ​ចំនួន៣គ្រឿង។

អធិការខណ្ឌរូបនេះ បានឲ្យ​ដែរថា ក្រោយពីបង្ក្រាបពួកគេទាំង៣នាក់ និងវត្ថុតាងថ្នាំញៀន បាននិងកំពុងស្ថិតក្រោមការឃុំខ្លួនសាកសួរបណ្ដោះអាសន្ន នៅអធិការដ្ឋានខណ្ឌ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ​ចាត់ការតាមនិតិវិធី៕​