(ដាម៉ាស)៖ ក្រុមអ្នកប្រយុទ្ធគាំទ្រ​រដ្ឋាភិបាលស៊ីរីយ៉ាងតិច ៤០នាក់ បានបាត់បង់ជីវិត ដោយសារសកម្មភាព​វាយប្រហារតាម​ផ្លូវអាកាស ដែល​​ត្រូវបានធ្វើ​ឡើងទៅលើ​មូលដ្ឋានទ័ពស៊ីរី នៅភាគខាងកើត​ប្រទេសមជ្ឈិមបូព៌ា​មួយនេះ។ នេះបើតាម​ក្រុមអង្កេតការណ៍​ស៊ីរី ដកស្រង់ខ្លឹម​សារ​ដោយទីភ្នាក់ងារ​ព័ត៌មានចិន ស៊ីនហួរ នៅល្ងាច​ថ្ងៃទី១៨ ខែមិថុនា​ ឆ្នាំ២០១៨។

ទីតាំងដែលស្ថិត​ក្រោមការវាយប្រហារ ត្រូវគេរាយការណ៍ថា គឺជាកម្មសិទ្ធិ​​របស់​ក្រុម​លីបង់-ហេបូឡា ព្រមទាំងកងកម្លាំង​គាំទ្ររដ្ឋាភិបាល​​នៅ​ក្បែរព្រំប្រទល់​​ស៊ីរី-អ៊ីរ៉ាក់ នៅខេត្ត ឌែរ អាល់ហ្សួរ (Deir al-Zour) ភាគ​អាគ្នេយ៍ស៊ីរី។ អង្គការឃ្លាំ​​មើលសិទ្ធិមនុស្ស​ស៊ីរី ដែលមានមូលដ្ឋាន​នៅទីក្រុងឡុងដ៍​បាន​ឲ្យដឹងថា អត្តសញ្ញាណ​របស់ក្រុមយន្តហោះ​ចម្បាំងខាងលើ ពុំត្រូវបានគេ​ស្គាល់ឡើយ ប៉ុន្តែបានប្រាប់ថា ចំនួនអ្នកស្លាប់​អាចនឹង​កើន​ឡើង ដោយសារ​តែក្រុមអ្នកប្រយុទ្ធ​ជាច្រើនទៀត កំពុងស្ថិតក្នុង​ស្ថានភាពធ្ងន់ធ្ងរ​ និងបាត់ខ្លួន។

គួរជម្រាបថា ផ្ទុយទៅវិញកាលពី​ព្រឹកថ្ងៃចន្ទនេះ ស្ថានីយទូរទស្សន៍​រដ្ឋស៊ីរី បានឲ្យដឹងថា ការទម្លាក់គ្រាប់បែក​តាមផ្លូវអាកាស​ខាងលើ ត្រូវ​បានធ្វើឡើង​ដោយក្រុមចម្រុះ​អន្តរជាតិ ដែលដឹកនាំដោយ​សហរដ្ឋអាមេរិក ហើយវាបានបណ្តាល​ឲ្យមានមនុស្សស្លាប់​ជាច្រើននាក់ ប៉ុន្តែ​​ពុំ​បានបញ្ជាក់​ចំនួនពិតប្រាកដ ឬអត្តសញ្ញាណជនរង​គ្រោះឡើយ។

ជុំវិញសេចក្តី​រាយការណ៍នេះ ក្រសួងការពារជាតិ​អាមេរិក បានចេញមុខទាត់​ចោលភ្លាមៗ ដោយថា វាពុំមានជាប់ពាក់ព័ន្ធ​នឹងទីក្រុងវ៉ាស៊ីន​តោន ឬ​ក៏ក្រុមចំរុះអន្តរជាតិឡើយ។ យ៉ាងណាមិញ នេះពុំមែនជាលើក​ទីមួយឡើយ ដែលក្រុមចំរុះអន្តរជាតិ និងអាមេរិក ត្រូវគេសង្ស័យថា​​ បានបើកការវាយប្រហារ​តាមផ្លូវអាកាស​ ទៅលើទីតាំង​យោធា​របស់ស៊ីរី នៅខេត្ត ឌែរ អាល់ហ្សួរ (Deir al-Zour)៕