(វ៉ាស៊ីនតោន)៖ បន្ទាប់ពីល្អូកល្អឺន​នឹងគ្នាបាន​មួយរយៈខ្លី ឥឡូវនេះគឺដល់ពេលត្រូវ​ព្រមានដាក់គ្នា​វិញម្ដង។ ជាក់ស្ដែង​អនុប្រធានាធិបតី​អាមេរិក លោក ម៉ៃក៍ ផែន (Mike Pence) នៅថ្ងៃចន្ទសប្ដាហ៍នេះ បានចេញ​មុខ​ជំនួសឲ្យលោក ដូណាល់ ត្រាំ ធ្វើការព្រមានចំៗលើ​មេដឹកនាំ​កូរ៉េខាងជើង លោក គីម ជុងអ៊ុន កុំឱ្យលេង​សើចជាមួយ​លោក​ប្រធានាធិបតី ដូណាល់ ត្រាំ។ នេះបើតាម​ការចេញផ្សាយ​ដោយ​សារព័ត៌មាន BBC នៅព្រឹកថ្ងៃអង្គារ ទី២២ ខែឧសភា ឆ្នាំ២០១៨។

លោក Mike Pence ធ្វើការកត់​សម្គាល់​បែបនេះ នៅក្នុងបទ​សម្ភាសន៍​ជាមួយស្ថានីយទូរទស្សន៍ Fox Ne​ws។ នា​ឱកាសនោះ លោក​អនុ​ប្រធានាធិបតី​អាមេរិក បានគូសបញ្ជាក់យ៉ាងដូច្នេះថា «វាគ្មានបញ្ហា​អ្វីនោះទេ​បើលោក ដូណាល់​ ត្រាំ មានបំណង​ដើរចេញ​ពីកិច្ច​ពិភាក្សា ​ដែលគ្រោងនឹងធ្វើ​ឡើងនៅប្រទេស​សិង្ហបុរី... ហើយខ្ញុំមិន​គិតឡើយ​ថា លោកប្រធានាធិបតី ត្រាំ កំពុងគិត​ពីទំនាក់ទំនង​សាធារណៈ តែគាត់កំពុង​គិតពីសន្តិភាព... ដូច្នេះវានឹង​ក្លាយជាកំហុស​មួយ​ដ៏ធំសម្រាប់លោក គីម ជុងអ៊ុន ដែលគិតថា គាត់អាច​លេង​ជាមួយ​លោក​ប្រធានាធិបតី ត្រាំ»។

គួររំលឹកថា កូរ៉េខាងជើង​កាលពី​សប្ដាហ៍មុន បានព្រមានលុបចោល​ជំនួបកំពូលរវាងលោក គីម ជុងអ៊ុន និងលោក ដូណាល់ ត្រាំ ដែលគ្រោងនឹង​ធ្វើឡើងក្នុង​ប្រទេសសិង្ហបុរី នៅថ្ងៃទី១២ ខែមិថុនា​ខាងមុខនេះ។ ការព្រមាន​នេះ កើតមានឡើង​ក្រោយ​សហរដ្ឋអាមេរិក និងកូរ៉េខាងត្បូង​នៅតែបន្តធ្វើ​សមយុទ្ធ​យោធា ហើយលើស​ពីនេះទៅទៀត ការប្រៀបធៀប​គំរូលុបបំបាត់​អាវុធនុយក្លេអ៊ែរ នៅលីប៊ី​អាចប្រើជាថ្មីនៅ​កូរ៉េខាងជើង របស់ទីប្រឹក្សា​សន្តិសុខជាតិ​អាមេរិក លោក ចន បូលតុន (John Bolton) កាន់តែធ្វើឱ្យ​ទីក្រុង​ព្យុងយ៉ាង​ខឹងសម្បារ៕