(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ បាននិយាយថា សហរដ្ឋអាមេរិក និងកូរ៉េខាងជើង បានចាប់ផ្ដើម​ហើយនូវ​ជំនួបដោយផ្ទាល់​កំរិតខ្ពស់ រវាងប្រទេស​ទាំងពីរ។ លោក ត្រាំ ថ្លែងបែបនេះ​បន្ទាប់ពីប្រព័ន្ធ​ផ្សព្វផ្សាយ​អាមេរិក​រាយការណ៍ថា រដ្ឋមន្ត្រី​ការបរទេស​អាមេរិក លោក ម៉ៃក៍ ប៉ុមផេអូ (Mike Pompeo) និងមន្ត្រីជាន់ខ្ពស់អាមេរិកមួយរូបទៀត បានជួបជា​មួយលោក គីម ជុងអ៊ុន ជាសំងាត់​ក្នុង​​ទីក្រុង​ព្យុងយ៉ាង កាលពីប៉ុន្មាន​សប្ដាហ៍​មុននេះ ដើម្បីជាការត្រួសត្រាយផ្លូវ សម្រាប់ជំនួប​ដោយផ្ទាល់​រវាង លោក គីម ជុងអ៊ុន និងលោក ដូណាល់ ត្រាំ។ នេះបើតាម​ការ​ចេញផ្សាយ​ដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃពុធ ទី១៨ ខែមេសា ឆ្នាំ២០១៨។

ថ្លែងក្រោយជំនួប​ជាមួយនាយករដ្ឋមន្ត្រី​ជប៉ុន លោក ស៊ីន ហ្សូអាបេ នៅឯទីកន្លែងកម្សាន្ត Mar-a-Lago នៃរដ្ឋផ្លូរីដា កាលពី​ថ្ងៃអង្គារ លោក ដូណាល់ ត្រាំ បានគូស​បញ្ជាក់​យ៉ាងដូច្នេះថា «យើងបានពិភាក្សា​កំរិតខ្ពស់​ដោយផ្ទាល់... គឺខ្ពស់បំផុតជា​មួយ​កូរ៉េខាងជើង»។​ បន្ថែមពី​លើនេះ​ លោក ត្រាំ ក៏បានបង្ហើប​ប្រាប់អ្នក​សារព័ត៌មានផងដែរពីទីតាំងចំនួន ០៥ ដែលអាច​នឹងក្លាយ​កន្លែងរៀបចំជំនួប​រវាងលោក និងលោក គីម​ ជុងអ៊ុន​ នៅ​ខែឧសភា ឬនៅដើម​ខែមិថុនា។ តែយ៉ាងណា​ក៏ដោយ​នៅពេលគេសួរថា តើទីតាំងទាំង៥នេះ ស្ថិតនៅ ក្នុងសហរដ្ឋអាមេរិក​ឬ? លោក ត្រាំ បាន​ឆ្លើយថា «ទេ»។

គួរបញ្ជាក់ថា នាយករដ្ឋ​ន្ត្រីជប៉ុន លោក ស៊ីន ហ្សូអាបេ កំពុងបំពេញដំណើរទស្សន​កិច្ចរយៈពេល​ពីថ្ងៃ​នៅ​សហរដ្ឋអាមេរិក ដោយផ្ដើមកាលពីថ្ងៃអង្គារ ហើយបើតាមការ​គ្រោងទុកលោក និងលោក ត្រាំ នឹងពិភាក្សាគ្នា​ពីការលុបបំបាត់​អាវុធនុក្លេអ៊ែរ​នៅលើ​ឧបទ្វីបកូរ៉េ ទំនាក់ទំនាក់ពាណិជ្ជកម្ម​ទ្វេភាគី និងបញ្ហាជាច្រើន​ទៀត៕