(ស៊ីដនី)៖ នាយករដ្ឋមន្ត្រី​ប៉ាពួញូហ្គីណេ លោក ភីធើ អូណែល (Peter O'Neill) បានអះអាងថា ជំនួយសរុបចំនួន ១២០តោន ត្រូវបានប្រគល់​ដល់ដៃ ប្រជាជនក្នុងតំបន់​រងគ្រោះ​ដោយសារគ្រោះរញ្ជួយដីកំរិត ៧.៥រ៉ិចទ័រ និងរំញ័រជាបន្តបន្ទាប់ទៀត កាលពីអំឡុងជាងពីរ​សប្ដាហ៍មុន។ នេះបើតាមការចេញផ្សាយ ដោយទីភ្នាក់ងារ​សារព័ត៌មាន​ចិន ស៊ីនហួរ នៅរសៀលថ្ងៃចន្ទ ទី១២ ខែមីនា ឆ្នាំ២០១៨។

ថ្លែងនៅក្នុងសេចក្ដី​ថ្លែងការណ៍មួយ លោក Peter O'Neill បានលើក​ឡើង​យ៉ាងដូច្នេះថា «ជំនួយសង្រ្គោះ​បន្ទាន់ ត្រូវបាន បញ្ជូនទៅដល់​ដៃប្រជាជន​រងគ្រោះ នៅក្នុងតំបន់ ហេឡា (Hela) ខេត្ត សោតធើន ហៃឡេនដ៍ (Southern Highlands) ដោយទីភ្នាក់ងារ​រដ្ឋាភិបាល ក្នុងនោះរួម មានទាំងជំនួយ​ជាស្បៀង​អាហារ ទឹក និងថ្នាំពេទ្យ ជាដើម»។ លោកបន្ថែមថា រហូតមក​ទល់​ពេលនេះ មនុស្សច្រើន​ជាង ១០០នាក់​បានស្លាប់ បន្ទាប់ពីមាន​គ្រោះរញ្ជួយដី​កំរិត ៧.៥រ៉ិចទ័រ កាលពី​ជាងពីរសប្ដាហ៍មុន​លើទីក្រុង មែនឌី (Mendi) ខេត្ត Southern Highlands។

គួរបញ្ជាក់ថា ដើម្បីបង្កើន​ប្រតិបត្តិការជួយ​សង្រ្គោះ រដ្ឋាភិបាល​ប៉ាពួញូហ្គីណេ បានផ្ដល់ជំនួយ​ជាប្រាក់ ៦២០,០០០ដុល្លារ ហើយបានសន្យាថា នឹងផ្ដល់​ប្រាក់បន្ថែម ៣១០,០០០ដុល្លារ ដើម្បីជួសជុល​ហេដ្ឋារចនាសម្ព័ន្ធ​ឡើងវិញ នៅតំបន់រងគ្រោះថែមទៀត៕