(ញូយ៉ក)៖ មនុស្សយ៉ាងហោច​ណាស់ ០២នាក់ស្លាប់ និង ០៤នាក់ផ្សេងទៀតរងរបួស នៅក្នុងករណីធ្លាក់​ឧទ្ធម្ភាគចក្រ​មួយគ្រឿង នៅក្នុងដងទន្លេ នៃភាគខាងកើត​ទីក្រុង​ញូយ៉ក​សហរដ្ឋអាមេរិក នៅយប់ថ្ងៃអាទិត្យ (ម៉ៅងនៅទីក្រុងញូយ៉ក)។ នេះបើតាម​ការចេញផ្សាយ​ដោយ Fox News នាព្រឹកថ្ងៃចន្ទ ទី១២ ខែមីនា ឆ្នាំ២០១៨។

មន្ត្រីសង្គ្រោះបន្ទាន់​ប្រចាំទីក្រុងដ៏ធំ នៃភាគឦសាន​អាមេរិមួយនេះ បានអះអាងថា អ្នកស្លាប់ទាំងពីរនាក់​ជាអ្នកដំណើរ និង ០៣នាក់ទៀត​ទទួលរងរបួស ខណៈពីឡុត​ម្នាក់​ដែលបញ្ជាការ​លើឧទ្ធម្ភាគចក្រនោះ អាចសង្គ្រោះខ្លួន​ឯងបាន ជាមួយរបួសបន្តិចបន្តួច​ប៉ុណ្ណោះ។ ព័ត៌មានបានបន្តទៀតថា អ្នករបួសទាំង ០៣នាក់នោះ គឺត្រូវ​បានគេស្រង់​ចេញ​ពីក្នុងទឹកទន្លេ ក្នុងអការៈធ្ងន់ធ្ងរខ្លាំង និងកំពុងសម្រាក​ព្យាបាល​នៅ​មន្ទីរពេទ្យ។

គួរបញ្ជាក់ថា ឧទ្ធម្ភាគចក្រ​ខាងលើនេះ ជាកម្មសិទ្ធិរបស់​ក្រុមទេសចរណ៍ Liberty Helicopeters ដែលវាបានធ្លាក់នៅវេលា​ម៉ោង ៧៖០០នាទីយប់ ទៅក្នុងទន្លេ​ទឹកកក នៃភាគខាងកើត​ទីក្រុងញូយ៉ក ដែលមាន​សីតុណ្ហភាព​ត្រជាក់បំផុត។ អ្នកឃើញ​ហេតុការណ៍​មួយចំនួនបាន​អះអាងថា ឧទ្ធាគចក្រខាង​លើនេះ ហោះក្នុងល្បឿនលឿន​រួចមុជចូល​ក្នុងទន្លេតែម្តង ប៉ុន្តែមូលហេតុនៃឧប្បដិហេតុច្បាស់នោះ កំពុងតែស្ថិតនៅ​ក្នុងការ​ស៊ើបអង្កេត៕