(វ៉ាស៊ីនតោន)៖ ក្រុមហ៊ុន Apple Inc បាន​និយាយថា ខ្លួនបានរកឃើញការរំលោភ​បំពានគោល​នយោបាយ​ការងារ ពីសំណាក់​អ្នកផ្គត់ផ្គង់​មួយចំនួន ក្នុងនោះរួមមាន​ទាំងការក្លែងបន្លំ​ទិន្នន័យ​ម៉ោងធ្វើការ ខណៈក្រុមហ៊ុន​អាមេរិកមួយនេះ​ កំពុងធ្វើសវនកម្ម ប្រចំាឆ្នាំពាក់ព័ន្ធ​នឹងលក្ខខណ្ឌពលករ​ផលិត​ទូរស័ព្ទដៃ iPhones និងផលិត​ដទៃទៀត។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន Reuters នៅព្រឹកថ្ងៃព្រហស្បតិ៍ ទី០៨ ខែមីនា ឆ្នាំ២០១៨។

យោងតាម​ក្រុមហ៊ុន Apple ក្រុមហ៊ុនផ្គត់ផ្គង់​ចំនួន ៧៥៦ ត្រូវបាន​ត្រួតពិនិត្យ នៅក្នុងប្រទេស​ចំនួន ៣០ ហើយ​ក្នុងនោះ ១៩៧ កំពុងធ្វើការ​ត្រួតពិនិត្យ​ជាលើក​ដំបូង។ Apple នៅក្នុង​សេចក្ដីថ្លែងការណ៍ ចេញផ្សាយ​កាលពី​ថ្ងៃពុធ បានឱ្យដឹងដូច្នេះថា «ក្រុមហ៊ុន​ជាង ៤៤ បានរំលោភលើច្បាប់​ការងារ​ កាលពីឆ្នាំ២០១៧ ពោលគឺកើនឡើង​ទ្វេដង​បើធៀបទៅនឹង​ឆ្នាំមុនៗ»។

លើស​ពីនេះ​ទៅទៀត ក្រុមហ៊ុនអាមេរិក​មួយនេះ​បានបន្ថែមថា បុគ្គលិកបីនាក់​ត្រូវបានគេបង្ខំ​ឱ្យបង់ប្រាក់ច្រើន​ហួសហេតុ ដើម្បីទទួល​បានការងារ។

គួរបញ្ជាក់ថា ជុំវិញករណី​នេះដែរ ពលករបរទេស ៧០០នាក់ មកពីប្រទេស​ហ្វីលីពីនត្រូវបាន​គេបង្ខំឱ្យបង់ប្រាក់​សរុបជាង ០១ លានដុល្លារ​ ដើម្បីទទួលបាន​ការងារក្នុងក្រុមហ៊ុន​ផ្គត់ផ្គង់សម្រាប់ Apple។ ប៉ុន្តែ Apple បាននិយាយថា ខ្លួនបាន​បង្ខំឱ្យក្រុមហ៊ុនទាំងនោះបង់​ប្រាក់ឱ្យពួកគេ​វិញ។ ម្យ៉ាងវិញ​ទៀត ផ្អែកលើម៉ោង​ធ្វើការ ៦០ម៉ោង​ក្នុងមួយ​សប្ដាហ៍ Apple ក៏បាន​អះអាង​ដែរថា ខ្លួនបាន​រកឃើញការ​បន្លំម៉ោងធ្វើការ ៣៨ករណី កាលពី​ឆ្នាំ២០១៧ ឬកើនឡើង ០៩ភាគរយ បើធៀបនឹង​ឆ្នាំ២០១៦៕​