(ស៊ីដនី)៖ ស្ថាបនិក​នៃសមាគមអ្នកទទួល​ជ័យលាភី «ពានរង្វាន់​ណូបែល​សន្តិភាព» បានចេញមុខ​រិះគន់​ធ្ងន់ៗ ទៅលើ​គោល​នយោ​​បាយ​​​​នុយ​ក្លេ​អ៊ែរ​ថ្មី​​​ របស់ទីក្រុង​វ៉ាស៊ីនតោន ដោយចាត់​ទុកថា វាជាផែនការ​មេ​សម្រាប់ធ្វើសង្រ្គាមនុយក្លេអ៊ែរ។ នេះ​បើ​តាម​​ការ​ចេញ​ផ្សាយ​ដោយ​​ទីភ្នាក់​ងារព័ត៌មានចិន ស៊ីនហួរ នៅរសៀល​ថ្ងៃអង្គារ ទី០៦ ខែកុម្ភៈ ឆ្នាំ២០១៨។

ដោយរៀបរាប់​របាយការណ៍ US 2018 Nuclear Posture Review (NPR) ថា ជាឯកសារគួរឲ្យព្រឺឆ្អឹងខ្នង​មួយនោះ លោក ធីលម៉ាន់ រ៉ាហ្វ (Tilman Ruff) បិតាស្ថាបនិក​នៃក្រុមយុទ្ធនាការ​អន្តរជាតិ សំដៅលុបបំបាត់​អាវុធ​នុយក្លេអ៊ែរ ហៅកាត់ថា ICAN បានលើក​ឡើងថា NPR ថ្មី​​របស់​​​សហរដ្ឋអាមេរិក កំពុង​បង្កហានិភ័យ​កាន់តែខ្លាំង​ ទៅរកការផ្ទុះ​សង្រ្គាម​នុយក្លេអ៊ែរ... វាកំពុងបង្ហាញ​យ៉ាងច្បាស់ថា ការប្រឈមមុខ​ដាក់​គ្នារវាង​មហាអំណាច ពោលគឺជា​មួយរុស្ស៊ី បានវិលត្រឡប់​មកវិញហើយ ដោយ​ប្រការនេះ បានស្តែងឲ្យ​ឃើញថា យើង​ទាំងអស់​គ្នា​​ កំពុងវិលទៅរក​សម័យសង្រ្គាម​ត្រជាក់វិញ​ហើយ។

គួរជម្រាបថា NPR ដែលស្ថិតក្រោម​ការលើកឡើង​ខាងលើ ត្រូវបានចេញ​ផ្សាយដោយ​ក្រសួងការពារជា​តិ​អាមេរិក កាលពី​ពេលថ្មី​ៗ​នេះ ដោយវាបាន​សង្កត់ធ្ងន់ទៅលើភាព​ចាំបាច់ នៃការពង្រឹង​សមត្ថភាពនុយក្លេអ៊ែរ​របស់អាមេរិក ​ដែលបើតាម​ការអះអាងពី​ទីក្រុង​​វ៉ាស៊ីនតោន គឺដើម្បីទប់ទល់​នឹងការប្រើប្រាស់​អាវុធនុយក្លេអ៊ែរ​ ដោយប្រទេស​រុស្ស៊ី។

ដោយឡែក ICAN ទទួលបានពានណូបែល​សន្តិភាពសម្រាប់​ឆ្នាំ២០១៧ សម្រាប់កិច្ច​ខិតខំប្រឹងប្រែង​របស់ខ្លួន ក្នុងការបង្វែរ​ចំណាប់​​អារម្មណ៍​ពិភពលោក ទៅកាន់គ្រោះ​មហន្តរាយនៃ​មនុស្សជាតិ ដែលអាចបង្ក​ឡើងដោយ​ការប្រើប្រាស់​សព្វាវុធ​-នុយក្លេអ៊ែរ៕