(សេអ៊ូល)៖ កូរ៉េខាងជើង​បានធ្វើសកម្មភាព​ដ៏ចម្លែកមួយ​ តាមរយៈការជីក​ផ្លូវក្រោមដី នៅប៉ែកខាងលិចនៃទីតាំងធ្វើតេស្ដនុយក្លេអ៊ែររបស់ខ្លួន ដែលនេះអាច​បញ្ជាក់បានថា ទីក្រុងព្យុងយ៉ាង​ទំនងជាកំពុងត្រៀម​ បំផ្ទុះក្បាលគ្រាប់​នុយក្លេអ៊ែរ​សាជាថ្មី។ នេះបើតាម​គេហទំព័រ​អាមេរិក 38 North ដកស្រង់ដោយ ទីភ្នាក់ងារព័ត៌មាន​យ៉ុនហាប់ នៅព្រឹកថ្ងៃសុក្រ ទី១២ ខែមករា ឆ្នាំ២០១៨។

គេហ័ទំព័រ 38 North ផ្អែកលើរូបថត​ជាច្រើនសន្លឹក ថតដោយផ្កាយរណប​លើទីតាំងសាកល្បង​នុយក្លេអ៊ែរ Punggye-ri បានឱ្យដឹងថា កូរ៉េខាងជើង​បានធ្វើ​សកម្មភាពគួរឱ្យកត់​សម្គាល់​ នៅជុំវិញប៉ែកខាងលិច​ នៃទីតាំងធ្វើ​តេស្ដនុយក្លេអ៊ែរ​របស់ខ្លួន កាលពី​ខែធ្នូកន្លងទៅ។ គេហ័ទំព័រ​អាមេរិក​មួយនេះ បានគូសបញ្ជាក់​យ៉ាងដូច្នេះថា «ទីតាំង​ធ្វើតេស្ដ​នុយក្លេអ៊ែរ ដែលកូរ៉េខាងជើង​បានដឹកនាំ​ការសាកល្បង​ បំផ្ទុះក្បាលគ្រាប់​នុយក្លេអ៊ែរទាំង ០៥លើក នៅតែមាន​ភាពស្ងប់ស្ងាត់​ដដែល ប៉ុន្តែសកម្មភាព​ជីកផ្លូវរូងក្រោមដី​ បែរជាកើនឡើង​ទៅវិញ នៅប៉ែក​ខាងលិច... ហើយនេះហាក់ដូចជា​បង្ហាញ​ពីភាពអាចទៅរួច នៃការធ្វើតេស្ដ​អាវុធនុយក្លេអ៊ែរ​សាជាថ្មី»។

គួរបញ្ជាក់ថា បើតាម​គេហទំព័រ 38 North កាលពីថ្ងៃទី២៨ ខែធ្នូ កន្លងទៅ មនុស្សរហូត​ដល់ទៅ ១២០នាក់ ក៏មានសកម្មភាព​នៅតាមតំបន់​ចំនួន ០៧ ផ្សេងៗពីគ្នា​នៃតំបន់​គាំទ្រផ្នែក​ខាងត្បូង (Southern Support Area) នៃទីតាំងសាកល្បង​នុយក្លេអ៊ែរ Punggye-ri ផងដែរ តែមូលហេតុ​នៃសកម្មភាពនេះ មិនទាន់ត្រូវបាន​គេបញ្ជាក់​នៅឡើយទេ។ កូរ៉េខាងជើង​បានធ្វើតេស្ដ​ បំផ្ទុះ​ក្បាលគ្រាប់​នុយក្លេអ៊ែរលើកទី០៦ កាលពីខែកញ្ញា ឆ្នាំ២០១៧៕