(យូអិន)៖ រដ្ឋមន្ត្រីការបរទេសអាមេរិក លោក រ៉ិច ធីល្លឺសុន បានអំពាវនាវឲ្យរដ្ឋាភិបាល​មីយ៉ាន់ម៉ា ដោះលែងអ្នកកាសែត Reuters ចំនួនពីររូប ដែលត្រូវបានអាជ្ញាធរប្រទេស​អាស៊ាន​មួយនេះចាប់ខ្លួនកាលពីសប្តាហ៍មុន ដែលនាំឲ្យមានការរិះគន់យ៉ាងខ្លាំង ពីសំណាក់​ក្រុម​សិទ្ធិ​មនុស្សអង្គការសហប្រជាជាតិនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាព្រឹកថ្ងៃសៅរ៍ ទី១៦ ខែធ្នូ ឆ្នាំ២០១៧។

លោក ធីល្លឺសុន បានប្រាប់អ្នកសារព័ត៌មាននានារួមទាំង Reuters នៅក្នុងទីក្រុងញូយ៉ក នាថ្ងៃសុក្រ សប្តាហ៍នេះថា «តំណាងនៃបេសកកម្មរបស់យើង ប្រចាំនៅស្ថានទូត​ក្នុងប្រទេស​មីយ៉ាន់ម៉ាបានសម្តែងចេញនូវក្តីព្រួយបារម្ភរួចទៅហើយ ជុំវិញការឃុំខ្លួន​អ្នកកាសែត​ទាំងពីររូប ហើយ​យើងសូមទាមទារឲ្យមាន ការដោះលែង​ពួកគេវិញជាបន្ទាន់»។

អ្នកសារព័ត៌មានទាំង​ពីរ​មានឈ្មោះថា Wa Lone និង Kyaw Soe OO ដែលមាន​មូលដ្ឋាន​​នៅក្នុងប្រទេស មីយ៉ាន់ម៉ា ផ្ទាល់តែម្តង។ ប្រមុខដឹកនាំ​អង្គការ​សហប្រជាជាតិ ក៏ធ្លាប់បានលើកឡើងផងដែរថា លោកមាន​ក្តីបារម្ភចំពោះប្រទេស​មីយ៉ាន់ម៉ា ដែលបានបំពានយ៉ាងធ្ងន់ធ្ងរ​ ទៅលើសិទ្ធិមនុស្សក្នុងអំឡុង​នៃយុទ្ធនាការ​បោសសម្អាត ពីសំណាក់ពួក​យោធា​ក្នុងរដ្ឋ Rakhine ដែលបង្ខំឱ្យ​ជនជាតិ Rohingya ចំនួន ៦០ម៉ឺននាក់ ត្រូវជម្លៀសខ្លួន​ទៅកាន់តំបន់ភាគខាងត្បូង​ ប្រទេស​បង់ក្លាដែស ចំណែកការ​ចាប់ខ្លួន​អ្នកកាសែត​ ទំនងជាពាក់ព័ន្ធនឹង​ករណីនេះ។

គួរបញ្ជាក់ថា អគ្គលេខាធិការ UN បានបាត់ទុករឿងនេះ ជាក្តីបារម្ភយ៉ាងខ្លាំង​ចំពោះការបាត់បង់​សេរីភាព​សារព័ត៌មាន ក្នុងប្រទេសនេះ»។ ដោយឡែក​នាយកសារព័ត៌មាន​ដ៏ល្បី Reuters លោក Stephen J.Adler បានលើកឡើងថា «យើងថ្កោលទោសជា​ខ្លាំង ចំពោះការវាយប្រហារទៅលើសេរីភាព​សារព័ត៌មានបែបនេះ ហើយបច្ចុប្បន្នយើង​កំពុងស្នើ ដល់អាជ្ញាធរដើម្បី​ដោះលែងឱ្យ​បានឆាប់»៕