(ប៉េកាំង)៖ ប្រទេសចិន និងវៀតណាម បានចុះហត្ថលេខា​លើកិច្ចព្រមព្រៀង​ពាណិជ្ជកម្ម​ចំនួន ៨៣ មានតម្លៃជាទឹកប្រាក់សរុប​ជាង ១.៩៤ពាន់លានដុល្លារ មុននឹងប្រធានាធិបតី​ចិន លោក ស៊ី ជិនពីង ធ្វើដំណើរ​ទៅកាន់ទីក្រុង​ហាណូយ ដើម្បីចូលរួម​កិច្ចប្រជុំ APEC។ នេះបើតាមការ​ចេញផ្សាយ​ដោយ ទីភ្នាក់ងារសារព័ត៌មាន​ចិន ស៊ីនហួរ នៅរសៀលថ្ងៃព្រហស្បតិ៍ ទី០៩ ខែវិច្ឆិកា ឆ្នាំ២០១៧។

យោងតាម​ ស៊ីនហួរ កិច្ចព្រមព្រៀង​ពាណិជ្ជកម្មនេះ ត្រូវបានធ្វើឡើង​នៅអំឡុង​ដំណើរទស្សនកិច្ច​របស់ ក្រុមអ្នកតំណាង​ក្រុមហ៊ុនចិនជាង ៣០ ក្រោមការរៀបចំ​ដោយក្រសួង​ពាណិជ្ជកម្ម ចិន​មកកាន់ប្រទេសវៀតណាម នៅថ្ងៃព្រហស្បតិ៍នេះ។ ជាមួយគ្នា​នោះដែរ ថ្លែងនៅក្នុងពិធី​ចុះហត្ថលេខា អនុប្រធាន​នៃនាយកដ្ឋាន​ពាណិជ្ជកម្ម​បរទេស នៃក្រសួង​ពាណិជ្ជកម្ម​ចិន លោក Zhi Luxun បានគូសបញ្ជាក់ថា នារយៈពេល​ប៉ុន្មានឆ្នាំចុង​ក្រោយនេះ កិច្ច​សហប្រតិបត្តិការ​សេដ្ឋកិច្ច និងពាណិជ្ជកម្ម​រវាងចិន និងវៀតណាម បានរក្សាភាពល្អប្រសើរ និងសម្រេចបាន លទ្ធផល​ជាទីគាប់ចិត្ត។

គួរបញ្ជាក់ថា លោក ស៊ី ជិនពីង នឹងបំពេញ​ដំណើរទស្សនកិច្ច​ទៅកាន់ប្រទេស​វៀតណាម ពីថ្ងៃទី១០ ដល់ថ្ងៃទី១១ ខែវិច្ឆិកានេះ ដើម្បីចូល​ជាមួយបណ្ដា​មេដឹកនាំដទៃ ក្នុងកិច្ចប្រជុំនៃ​វេទិកាកិច្ចសហប្រតិបត្តិការ​អាស៊ី-​ប៉ាស៊ីហ្វិក (​APEC)លើកទី២៥ រៀបចំ​ឡើងក្នុង​ទីក្រុង Da Nang នៃតំបន់​ភាគកណ្តាលប្រទេសវៀតណាម ដែលទើបតែរងគ្រោះ​​ដោយព្យុះទីហ្វុងដំរី ផ្តាច់ជីវិត​មនុស្សជិត ១០០នាក់ កាលពីចុង​សប្តាហ៍មុន៕