(វ៉ាស៊ីនតោន)៖ មនុស្សពីរនាក់​ត្រូវបានសម្លាប់ និងជាច្រើន​នាក់ទៀតរងរបួស ក្នុងនោះរួមមាន​ទាំងមន្ត្រីល្បាត​ផងដែរ នៅក្នុងហេតុការណ៍​បាញ់ប្រហារ​មួយនាថ្ងៃចន្ទ នៅឯ​តំបន់ ឡេក ខោនធី (Lake County) ស្ថិតនៅ​ចំងាយ ១៤០គីឡូម៉ែត្រ ពីភាគខាងជើងទីក្រុង សាន់ហ្វ្រាន់ស៊ីស្កូ (San Francisco) នៃភាគខាងលិចរដ្ឋ កាលីហ្វរញ៉ា (California) សហរដ្ឋអាមេរិក។ នេះបើតាម​ប្រព័ន្ធផ្សព្វផ្សាយ​នៅក្នុងស្រុក​ ដកស្រង់​ដោយ​ទីភ្នាក់ងារសារព័ត៌មាន​ចិន ស៊ីនហួរ នៅរសៀលថ្ងៃអង្គារ ទី២៤ ខែតុលា ឆ្នាំ២០១៧។

ព័ត៌មានខាងលើនេះ ឲ្យដឹងទៀតថា លោក ប្រ៊ីយ៉ាន ម៉ាទីន (Brian Martin) សាកសព​បុរសពីរនាក់ ត្រូវបានគេប្រទះ​ឃើញនៅក្នុងផ្ទះ​មួយកន្លែង ដែលខ្មាន់កាំភ្លើង​មានទំនាក់ទំនង​ជាមួយ។ លោក Martin បានឱ្យដឹង​ដែរថា ខ្មាន់កាំភ្លើងមាន ឈ្មោះ អាឡាន់ អាសម័រ (Alan Ashmore) មានអាយុ ៦១ឆ្នាំ ហើយរូបគេ​ត្រូវបានចាប់ខ្លួន​ បន្ទាប់ពី​បានបើកការបាញ់រះ លើហ្វូងមនុស្សនៅ​ឯទីតាំងជាច្រើន​កន្លែង ក្នុងនោះមានទំាង​ផ្ទះនៅក្បែរខាង ព្រមទាំងស្ថានីយ៍​បញ្ចូលហ្គាស​មួយផងដែរ។

គួរបញ្ជាក់ថា បើតាមលោក Brian Martin ខ្មាន់កាំភ្លើង​ឈ្មោះ Ashmore កំពុងជាប់ឃុំ​ពីបទមនុស្សឃាត ដោយចេតនា​លើបុរសពីរនាក់​ខាងលើ និងបង្កឱ្យមនុស្ស​ជាច្រើននាក់​រងរបួស។ ប៉ុន្តែភ្លាមៗបែបនេះ អត្តសញ្ញាណ​ជនរងគ្រោះ និងមូលហេតុ​នៃករណីបាញ់ប្រហារ មិនទាន់ត្រូវគេបញ្ជាក់​នៅឡើយទេ ខណៈការស៊ើ​បអង្កេតកំពុង​ដំណើរការ៕