(ម៉ូស្គូ)៖ ទីក្រុងប៉េកាំង និងទីក្រុងម៉ូស្គូ​នាថ្ងៃសុក្រនេះ​បានព្រមព្រៀងគ្នា ដើម្បីពង្រឹង​កិច្ចសហប្រតិបត្តិការ នៃប្រទេស​ទាំង​ពីរ សំដៅងាកទៅ​ការអភិវឌ្ឍ​តំបន់ចុងភាគ​ខាងកើត (Far East) ដែលទីតាំងយុទ្ធសាស្រ្ត​ដ៏សំខាន់បំផុតមួយ។ នេះបើតាម​ការចេញ​ផ្សាយដោយ ទីភ្នាក់ងារព័ត៌មានចិន ស៊ីនហួរ នៅរសៀល​ថ្ងៃសៅរ៍ ទី០៩ ខែកញ្ញា ឆ្នាំ២០១៧។

កិច្ចព្រមព្រៀងខាងលើ​បានកើតមានឡើង នៅក្នុងកិច្ចប្រជុំរវាង​ឧបនាយករដ្ឋមន្រ្តីចិន លោក វ៉ាង យ៉ាង (Wang Yang) និង​ឧបនាយករដ្ឋមន្រ្តី​រុស្ស៊ី លោក យូរី ទ្រូតនេវ (Yury Trutnev) នៅទីក្រុង ខាបារ៉ូវក៍ (Khabarovsk) ស្តីពីកិច្ចសហប្រតិបត្តិការ​អន្តររដ្ឋាភិ​បាល រវាងតំបន់ភាគឦសាន​របស់ចិន និងតំបន់ចុងភាគខាងកើត​របស់រុស្ស៊ី។

គួរបញ្ជាក់ថា តំបន់យុទ្ធសាស្រ្ត​ខាងលើនេះ គឺស្ថិតនៅកៀក​សហរដ្ឋអាមេរិក និងក្បែរប្រទេស​កូរ៉េខាងជើង ថែមទៀត ដែល​​កំពុងតែមាន​ភាពតានតឹង ជាមួយទីក្រុងវ៉ាស៊ីនតោន។ ម៉្យាងវិញទៀត ការងាកទៅ​ផ្តោតសំខាន់ លើការអភិវឌ្ឍនៅតំបន់ Far East បែបនេះ ក៏អាចជាចេតនា​របស់រុស្ស៊ី និងចិន​ក្នុងការទប់ស្កាត់​ឥទ្ធិពលរបស់ អាមេរិកមក​លើតំបន់អាស៊ីបូព៌ា​ផង​ដែរ​៕