(វ៉ាស៊ីនតោន)៖ អ៊ីស្រាអែល នៅថ្ងៃអាទិត្យនេះ ត្រូវបានរាយការណ៍ថា បានទទួលគ្រាប់បែកធុនធ្ងន់ MK-84 ពីសហរដ្ឋអាមេរិក បន្ទាប់ពីប្រធានាធិបតី ដូណាល់ ត្រាំ បានលុបចោលការរឹតបន្តឹង ដែលដាក់ដោយរដ្ឋបាល បៃដិន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

គ្រាប់បែក MK-84 នេះ គឺជាគ្រាប់បែកទម្ងន់ ២,០០០ ផោន ដែលមានសមត្ថភាពបំផ្លិចបំផ្លាញខ្ពស់។ រដ្ឋបាល បៃដិន បានរារាំងការនាំចេញគ្រាប់បែកទាំងនេះ ទៅកាន់អ៊ីស្រាអែល ដោយសារការព្រួយបារម្ភអំពីផលប៉ះពាល់ទៅលើជនស៊ីវិល នៅក្នុងតំបន់ហ្គាហ្សា។ ប៉ុន្តែ ប្រធានាធិបតីអាមេរិក ដូណាល់ ត្រាំ បានលុបចោលការរឹតបន្តឹងនេះ បន្ទាប់ពីឡើងកាន់តំណែង។

«ការដឹកជញ្ជូនអាវុធ ដែលបានមកដល់អ៊ីស្រាអែលនៅយប់នេះ គឺតំណាងឱ្យទ្រព្យសម្បត្តិដ៏សំខាន់ សម្រាប់កងទ័ពអាកាស និងយោធាអ៊ីស្រាអែល ហើយក៏ជាភស្តុតាងបន្ថែមទៀត នៃសម្ព័ន្ធភាពដ៏រឹងមាំ រវាងអ៊ីស្រាអែលនិងសហរដ្ឋអាមេរិក» រដ្ឋមន្រ្តីការពារជាតិអ៊ីស្រាអែល លោក Katz បាននិយាយ។

ការទទួលបានអាវុធបន្ថែមពីសហរដ្ឋអាមេរិកនេះ កើតឡើងចំពេលដែលមានភាពមិនប្រាកដប្រជា ជុំវិញបទឈប់បាញ់នៅហ្គាហ្សា ​ខណៈដែលទាំងភាគីអ៊ីស្រាអែល និងហាម៉ាស់ បានចោទប្រកាន់គ្នាទៅវិញទៅមក ពីបទរំលោភបទឈប់បាញ់។

គួរបញ្ជាក់ថា ការផ្តល់គ្រាប់បែកនេះ បង្ហាញពីការគាំទ្រយ៉ាងខ្លាំងរបស់រដ្ឋបាល ត្រាំ ចំពោះអ៊ីស្រាអែល។ វាក៏បង្កើនការព្រួយបារម្ភ អំពីការកើនឡើងនៃអំពើហិង្សានៅក្នុងតំបន់ និងផលប៉ះពាល់ ដល់ជនស៊ីវិល៕