(ព្រុចស៊ែល)៖ សហភាពអឺរ៉ុប (EU) និងប្លុក Mercosur របស់អាមេរិកខាងត្បូង នៅថ្ងៃសុក្រនេះ បានបញ្ចប់រួចរាល់នូវកិច្ចព្រមព្រៀងពាណិជ្ជកម្មសេរីដ៏ចម្រូងចម្រាសមួយ ដែលមានគោលបំណងលុបបំបាត់ពន្ធ និងបន្ធូរបន្ថយរបាំងពាណិជ្ជកម្ម រវាងប្លុកទាំងពីរ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០៦ ខែធ្នូ ឆ្នាំ២០២៤។

ប្រធានគណៈកម្មការអឺរ៉ុប លោកស្រី Ursula von der Leyen បានសម្តែងការសាទរ ចំពោះកិច្ចព្រមព្រៀងនេះ ដោយចាត់ទុកថា ជាជ័យជម្នះសម្រាប់អឺរ៉ុប។ លោកស្រីបានប្រាប់សន្និសីទសារព័ត៌មាន នៅទីក្រុង Montevideo ប្រទេសអ៊ុយរូហ្គាយ ថា «នេះគឺជាការឈ្នះសម្រាប់អឺរ៉ុប»។

ទោះជាយ៉ាងណា កិច្ចព្រមព្រៀងនេះ នៅតែត្រូវការមានការអនុម័តពីសភាអឺរ៉ុប ​និងរដ្ឋជាសមាជិក ដែលអាចនឹងជួបប្រទះការលំបាក ដោយសារការប្រឆាំងពីប្រទេសមួយចំនួន។ បារាំង និងអ៊ីតាលី បានបង្ហាញការព្រួយបារម្ភថា កិច្ចព្រមព្រៀងនេះ អាចនាំឱ្យមានការនាំចូលផលិតផលកសិកម្មថោកៗ ពីអាមេរិកខាងត្បូង ដែលនឹងប៉ះពាល់ដល់កសិករអឺរ៉ុប៕