(ញូដេលី)៖ ក្រសួងការពារជាតិ​ឥណ្ឌា បើកភ្លើងខៀវឲ្យទិញម៉ាស៊ីនរហូតដល់​១,០០០គ្រឿង សម្រាប់​រថក្រោះធុន​ T-72 ដែល​បង្កើត​ឡើង​​​តាំង​ពីជំនាន់សម័យ​សូវៀត ដើម្បីបង្កសក្តានុពល​នៃវិស័យការពារជាតិ របស់ប្រទេស​មហាយក្ស​លេខ ២ ប្រចាំទ្វីប​អាស៊ីនេះបន្ថែម​ទៀត។ នេះបើតាម​ការដកស្រង់​ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃ​ពុធ​ ទី២៦ ខែកញ្ញា ឆ្នាំ២០១៨។

គម្រោងដែល​មានតម្លៃ​ ២៣ពាន់លានរូពី ឬស្មើនឹង ៣១៧លានដុល្លារនេះ ត្រូវបានអនុញ្ញាតដោយ​ ក្រុមប្រឹក្សា​ទទួលបន្ទុកការ​ទិញសព្វាវុធ​ការពារជាតិ​នៃ​ប្រទេសឥណ្ឌា ដែលមានរដ្ឋមន្រ្តី​ការពារជាតិ លោកស្រី ណឺម៉ាឡា ស៊ីថារ៉ាម៉ាន់ (Nirmala Sitharaman) ក្នុងអំឡុងកិច្ចប្រជុំមួយ ដែលធ្វើឡើង​នៅ​រដ្ឋធានី​ញូដេលី។

បើតាមការ​បញ្ជាក់ពីក្រសួងការពារ​ជាតិ ម៉ាស៊ីនថ្មីមួយពាន់គ្រឿងនេះ នឹងជួយពង្រឹង​សមត្ថភាព​របស់​រថក្រោះ T-72 នៅលើ​សមរភូមិ។ មួយផ្នែកធំ​នៃម៉ាស៊ីនទាំងនោះ នឹងត្រូវអភិវឌ្ឍន៍​​ដោយ​ក្រុមហ៊ុន​រដ្ឋ Ordnance Factories Board។

គួរជម្រាបថា រថក្រោះ T-72 និង T-90 ផលិតឡើង​ដោយរុស្ស៊ី គឺជាសព្វាវុធស្នូល​នៅក្នុងជួរកងទ័ពជើងគោក​ឥណ្ឌា តាំង​ពី​រាប់​ទសវត្សរ៍​​មកម្ល៉េះ ប៉ុន្តែរថក្រោះទាំងនេះ​ភាគច្រើន កំពុងតែឈាន​ចូលដល់អាយុកាល​យ៉ាងចំណាស់ៗ​ទៅហើយ ដែលមិនអាចបណ្តោយ​ឲ្យវាកាន់តែយ៉ាប់​ជាងនេះឡើយ៕