(សៀមរាប)៖ លោក ឃឹម ប៊ុនសុង អភិបាលខេត្តសៀមរាប និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នៅថ្ងៃទី២២ ខែកញ្ញា ឆ្នាំ២០១៨នេះ បានជួបសំណេះសំណាល និងនាំយកអំណោយចែកជូនប្រជាពលរដ្ឋដែលខ្វះខាតស្បៀង និងងាយរងគ្រោះ ក្នុងរដូវវស្សាចំនួន៩៥គ្រួសារ មកពី៥ឃុំក្នុងស្រុកពួក ដើម្បីជួយដោះស្រាយជីវភាពក្នុងគ្រួសារ។
អំណោយមនុស្សធម៌ ដែលបានផ្ដល់ជូនប្រជាពលរដ្ឋទាំង៩៥គ្រួសារក្នុងឱកាសនោះ ១គ្រួសារទទួលបានមុង១, ក្រមា១, ភួយ១, សារុង១, ប្រេងឆា១ដប, ទឹកស៊ីអ៊ីវ១យួ, មី១កេស, អង្ករ២៥គីឡូក្រាម និងថវិកា២ម៉ឺនរៀល។
ថ្លែងក្នុងឱកាសនោះ លោក ឃឹម ប៊ុនសុង បានថ្លែងអំណរគុណដល់ប្រជាពលរដ្ឋទាំងអស់ ដែលបានបោះឆ្នោតគាំទ្រគណបក្សប្រជាជនកម្ពុជា ដែលអាចឲ្យសម្ដេចតេជោ ហ៊ុន សែន បន្ដធ្វើជានាយករដ្ឋមន្ដ្រីនៃកម្ពុជា និងនាំយកនូវការផ្ដាំផ្ញើសាកសួរសុខទុក្ខរបស់សម្ដេចតេជោ និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនប្រជាពលរដ្ឋផងដែរ។
លោកអភិបាលខេត្ត ក៏បានណែនាំឲ្យប្រជាពលរដ្ឋទាំងអស់ក៏ត្រូវមានការប្រុងប្រយ័ត្នខ្ពស់ ក្នុងពេលដែលភូមិដ្ឋានរងការលិចទឹក ចំពោះកូនចៅ កុមារតូចៗ កុំឲ្យចុះលេងទឹក ខ្លាចមានកើតនូវប្រការអាក្រក់ណាមួយ ចំពោះក្រុមគ្រួសាររបស់បងប្អូននៅពេលមានទឹកជំនន់នេះ។
លោក ឃឹម ប៊ុនសុង ក៏បានធ្វើការផ្តាំផ្ញើ និងណែនាំដល់បងប្អូនប្រជាពលរដ្ឋរងគ្រោះ ដែលបានមកបោះតាំងលំនៅស្នាក់នៅបណ្តោះអាសន្នលើទីទួលសុវត្ថិភាព និងត្រូវយកចិត្តទុកដាក់លើការថែទាំសុខភាព ដោយបរិភោគទឹកស្អាត សំខាន់ត្រូវមានការប្រុងប្រយ័ត្ន និងបង្ការឲ្យបានខ្ពស់ចំពោះសត្វអសិរពឹស ព្រមទាំងធ្វើអនាម័យ បរិស្ថាន នៅជុំវិញលំនៅដ្ឋានក្រោយពេលទឹកស្រក៕
