(ណាននីង-ចិន)៖ ឧបនាយករដ្ឋមន្ដ្រី ហោ ណាំហុង តំណាងសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានអញ្ជើញសម្ពោធស្ដង់ផលិតផលខ្មែរក្នុងឱកាស «ពិព័រណ៍ចិន-អាស៊ាន លើកទី១៥» នៅទីក្រុងណាននីង ខេត្តក្វាងស៊ី សាធារណរដ្ឋប្រជាមានិតចិន ដែលមានស្ដង់ទំនិញចំនួន១៤៥ស្ដង់។
ក្នុងពិធីនៅថ្ងៃទី១២ ខែកញ្ញា ឆ្នាំ២០១៨ ឧបនាយករដ្ឋមន្ត្រី ហោ ណាំហុង បានទស្សនាស្ដង់ផលិតផលកម្ពុជាជាច្រើន និងលើកទឹកចិត្តឲ្យក្រុមហ៊ុនខ្មែរទាំងនោះ ខិតខំបង្ហាញ និងលក់ផលិតផលកម្ពុជាឲ្យបានច្រើននៅប្រទេសចិន ដើម្បីសម្រេចបានការផ្លាស់ប្ដូរពាណិជ្ជកម្មរវាងកម្ពុជា-ចិន ឲ្យបាន៦,០០០លានដុល្លារ នៅឆ្នាំ២០២០ខាងមុខនេះ។
ក្នុងពិធីពិព័រណ៍នោះ ឧបនាយករដ្ឋមន្ត្រី ហោ ណាំហុង ក៏បានទស្សនាការដាក់តាំងបង្ហាញរបស់តំបន់សេដ្ឋកិច្ចពិសេសរបស់ចិន នៅខេត្ដព្រះសីហនុ ដែលសព្វថ្ងៃមានជាង១២០រោងចក្រ និងក្រុមហ៊ុនកំពុងដំណើរការយ៉ាងសកម្ម និងមានកម្មករខ្មែរយើងជាង២ម៉ឺននាក់។ ទន្ទឹមនឹងនោះ លោកបានទស្សនាការតាំងបង្ហាញតំបន់សេដ្ឋកិច្ច ពិសេសនៅស្ទឹងហាវ ខេត្ដព្រះសីហនុ ដែលភាគីចិនសហការជាមួយខ្មែរយើងវិនិយោគថវិកា ជាង១០ពាន់លានដុល្លារ។
នៅល្ងាចថ្ងៃដដែលនោះ ឧបនាយករដ្ឋមន្ដ្រី ហោ ណាំហុង បានទទួលជួបលោកស្រី អ៊ូ សុងឆុង (Wu Zhongqiong) អភិបាលរងខេត្តជាំងស៊ី ដែលមានប្រជាជន ចំនួន៤៦លាននាក់ បានអញ្ជើញលោកទៅទស្សនកិច្ច នៅខេត្ដជាំងស៊ី។
លោកស្រី អ៊ូ សុងឆុង បានថ្លែងថា ខេត្តជាំងស៊ី ចង់មានកិច្ចសហប្រតិបត្ដិការវិស័យទេសចរណ៍ជាមួយកម្ពុជា ដើម្បីឲ្យទេសចរណ៍ចិននៅខេត្ដជាំងស៊ី មកទស្សនាកម្ពុជាឲ្យបានច្រើន ព្រមទាំងចង់ឲ្យមានការផ្លាស់ប្ដូរពាណិជ្ជកម្មជាមួយកម្ពុជា ជាពិសេសចង់ទិញកសិផលពីកម្ពុជា។
បន្ថែមពីនេះ ឧបនាយករដ្ឋមន្ត្រី ហោ ណាំហុង បានស្វាគមន៍យ៉ាងកក់ក្ដៅនូវបំណងរបស់ខេត្ដជាំងស៊ីនេះ ហើយក្នុងពេលដែលកម្ពុជា កំពុងរកទីផ្សារលក់កសិផលកម្ពុជា ព្រមទាំងជំរុញទេសចរចិនមកកម្ពុជាឲ្យបានច្រើន។ ឧបនាយករដ្ឋមន្ត្រី ក៏សំណូមពរឲ្យមានការហោះហើរ ត្រង់ពីខេត្ដជាំងស៊ីមកកម្ពុជា ដើម្បីផ្លាស់ប្ដូរទេចរចិនមកទស្សនាកម្ពុជាឲ្យបានច្រើន និងឲ្យមានការវិនិយោគចិននៅខេត្តជាំងស៊ី មកវិនិយោគនៅកម្ពុជាឲ្យបានច្រើន។
ក្នុងឱកាសនោះដែរ លោក ហោ ណាំហុង ក៏បានជម្រាបលោកស្រី Wu Zhongqiong អភិបាលរងខេត្តជាំងស៊ី អំពីទំនាក់ទំនងពិសេសរវាងប្រទេសយើងទាំងពីរ ដែលបានកើនឡើងដល់ភាពជាដៃគូយុទ្ធសាស្រ្ដគ្រប់ជ្រុងជ្រោយ៕
