(ភ្នំពេញ)៖ រដ្ឋបាលខណ្ឌដង្កោ បានរៀបចំទិវាសម្អាតពិភពលោក នៅព្រឹកថ្ងៃទី១៤ ខែកញ្ញា ឆ្នាំ២០១៨នេះ ដឹកនាំដោយ​លោក នុត ពុធដារ៉ា អភិបាលខណ្ឌដង្កោ ដោយមានការចូលរួមពីមន្ត្រីជុំវិញខណ្ឌ កម្លាំងអធិការការដ្ឋាននគរបាលខណ្ឌ កម្លាំងកងរាជអាវុធហត្ថខណ្ឌ សណ្តាប់ធ្នាប់ខណ្ឌ យុវជនស.ស.យ.ក និងប្រជាពលរដ្ឋ ប្រមាណ៣០០នាក់។​

ជាមួយគ្នានោះ នៅតាមមូលដ្ឋានសង្កាត់ទាំង១៣ ទីវត្តអារាម សាលារៀន និងទីសាធារណៈនានាក៏បានរៀបចំប្រារព្ធទិវាសម្អាតពិភាពលោកផងដែរ ដោយមានការចូលរួមពីមន្ត្រីរាជការ កងកម្លាំងគ្រប់ប្រភេទ សិស្សានុសិស្ស លោកគ្រូអ្នកគ្រូ ព្រះសង្ឃ។

សូមជម្រាបថា ទិវានេះប្រារព្ធឡើងក្នុងគោលបំណង​លើកទឹកចិត្តឲ្យប្រជាពលរដ្ឋ ចូលរួមក្នុងការគ្រប់គ្រងសំរាម ក្នុងប្រទេស និងជាការលើកម្ពស់ ការយល់ដឹងដល់ប្រជាជន​ អំពីស្ថានភាពធ្ងន់ធ្ងរនៃសំរាមដែលកើតឡើង នៅលើភពផែនដី ហើយគោលបំណង នៃទិវានេះ​ក៏ស្របទៅនឹងការប្រឡងប្រណាំង ទីក្រុងស្អាត ដែលផ្តួចផ្តើម និងដឹកនាំផ្ទាល់របស់​សម្តេច​តេជោ ហ៊ុន សែន នាយករដ្ឋមន្ត្រី​នៃ​កម្ពុជា៕