(ស្វាយរៀង)៖ អ្នកភូមិមួយចំនួន នៃស្រុករមាសហែក ខេត្តស្វាយរៀង បាននាំគ្នាសម្រុកដាំដើមឫស្សីពីងពង់ ព្រោះឫស្សីមួយប្រភេទនេះ ដែលគេយកទៅធ្វើផ្ទះ និងគ្រឿងសង្ហារឹមផ្សេងៗ និងដោយមើលឃើញពីគុណប្រយោជន៍របស់ឫស្សីនេះ ទើបអ្នកស្រុករមាសហែក ជាពិសេសអ្នករស់នៅឃុំដូង ដែលមានឫស្សីពីងពង់ស្រាប់ បានត្រូវប៉ាន់ ព្រោះមានទីផ្សារលក់ទៅឱ្យឈ្មួញវៀតណាមបានកើនឡើង ដោយបានតម្លៃសមរម្យគ្រប់គ្រាន់បានដោះស្រាយជីវភាពប្រចាំថ្ងៃ។
បើតាមស្ត្រីចំណាស់ម្នាក់ រស់នៅភូមិបាត្រាស់ ឃុំដូងបូង បានឱ្យដឹងថាសព្វថ្ងៃគាត់មានចិត្តសប្បាយរីករាយ ខណៈមានជីវភាពធូរធាមួយកម្រិត ដោយមានក្រុមឈ្មួញវៀតណាមឡើងមកទិញដល់ភូមិ -ឃុំ របស់ពួកគាត់តែម្តង។
ឫស្សីពីងពង់នេះត្រូវបានប្រជាពលរដ្ឋខ្លះ បានដើរប្រមូលទិញពីភូមិឃុំផ្សេងៗទៀត នៃស្រុករមាសហែក មកលក់នៅភូមិបាត្រាស់ ហើយរថយន្តរបស់ឈ្មួញវៀតណាម មកដឹកយកទៅលក់បន្តទៀតនៅប្រទេសវៀតណាម ដោយឫស្សីពីងពង់មួយដើម ជាប្រភេទលេខមួយបាន២,៧០០រៀល លេខ២បានតម្លៃ២,០០០រៀល និងប្រភេទលេខ៣ បានតម្លៃចំនួន១,៥០០រៀល។
អ្នកភូមិបាត្រាស់បានឱ្យដឹងទៀតថា ឫស្សីពីងពង់នេះគេយកទៅធ្វើជាគ្រឿងសង្ហារឹម មានតុ កៅអី និងធ្វើផ្ទះសំបែងផងដែរ។ មិនតែប៉ុណ្ណោះបើពុំមានការដាំឡើងវិញទេ ច្បាស់ជាប្រភេទឫស្សីពីងពង់ និងបាត់បន្តិចម្តងៗអាចឈានទៅដល់ការបាត់បង់ទាំងស្រុង ព្រោះឈ្មួញវៀតណាមមានតម្រូវការច្រើន ដើម្បីផ្គត់ផ្គង់ទីផ្សារនៅប្រទេសរបស់គេ។
អ្នកភូមិបានបន្ថែមទៀតថា ឫស្សីពីងពង់នេះបើដាំវាវិញ មានរយៈពេលយូរទម្រាំបានផលគឺដាំតាមធម្មជាតិរបស់វាពី៤ទៅ៦ឆ្នាំឯណោះ ទើបទទួលផលបាន៕
