(កំពង់ធំ)៖ លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្តកំពង់ធំ នៅល្ងាចថ្ងៃទី១២ ខែកញ្ញា ឆ្នាំ២០១៨នេះ បានបន្តដឹកនាំក្រុមការងារសមាគមអតីតយុទ្ធជនខេត្តកំពង់ធំ ចុះជួបសំណេះសំណាល សួរសុខទុក្ខ និងនាំយកអំណោយមួយចំនួនរបស់សម្តេចតេជោ ហ៊ុន សែន ប្រគល់ជូនអតីតយុទ្ធជនពិការដោយសារសង្គ្រាមម្នាក់ ដែលរស់នៅភូមិស្វាយកល្ប ឃុំកកោះ ស្រុកសន្ទុក ខេត្តកំពង់ធំ។
អតីតយុទ្ធជនពិការខាងលើមានឈ្មោះ ស្រម៉ៃ ថា អាយុ៥២ឆ្នាំ បានចូលបម្រើការងារក្នុងជួរកងទ័ពតាំងពីឆ្នាំ១៩៨២ នៅអតីតអង្គភាពកងពល២៨៦ ហើយបានធ្លាក់ខ្លួនពិការនៅឆ្នាំ១៩៨៥ នៅក្នុងសមរភូមិម៉ាឡៃ ទឹកដីប៉ៃលិន។ ជាអកុសល ភរិយារបស់អតីតយុទ្ធជនរូបនេះ ក៏ជាជនពិការដែរ ហើយកំពុងមានជំងឺ ត្រូវទទួលខុសត្រូវរាប់រងចិញ្ចឹមកូនចៅចំនួន៤នាក់ថែមទៀត។
ក្នុងឱកាសនោះ លោកឧត្តមសេនីយ៍ទោ សោម ស៊ុន និងក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានពាំនាំនូវអំណោយរបស់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា តាមរយៈលោកឧត្ដមសេនីយ៍ឯក ហ៊ុន ម៉ាណែត អគ្គលេខាធិការរងសមាគមអតីតយុទ្ធជនកម្ពុជា ផ្ដល់ជូនគាត់នូវអង្ករចំនួន ៥០គីឡូក្រាម មីយើង ២កេះ ទឹកត្រីទឹកស៊ីអ៊ីវ ២យួរ និងថវិកាចំនួន ១០០,០០០រៀល។
សូមបញ្ជាក់ថា នៅក្នុងខែមីនា ឆ្នាំ២០១៧កន្លងមក គណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ ក៏បានសាងសង់ផ្ទះមួយខ្នង ទំហំ៤ម៉ែត្រx៦ម៉ែត្រ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រធានសមាគមអតីតយុទ្ធជនកម្ពុជា សម្រាប់ផ្ដល់ជូនគាត់ និងក្រុមគ្រួសារស្នាក់នៅរួចហើយ៕
