(ភ្នំពេញ)៖ នៅព្រឹកថ្ងៃទី០៩ ខែកញ្ញា ឆ្នាំ២០១៨នេះ ក្រសួងអប់រំ យុវជន និងកីឡា ចាប់ផ្តើមបោះពុម្ពលទ្ធផល នៃការប្រឡងសញ្ញាបត្រ មធ្យមសិក្សាទុតិយភូមិ ចំណេះទូទៅ និងបំពេញវិជ្ជា (បាក់ឌុប) សម័យប្រឡង៖ ២០ សីហា ខណៈរាជធានីភ្នំពេញ និងខេត្តកណ្ដាល នឹងប្រកាសលទ្ធផលនៅថ្ងៃនេះ ដោយឡែកសម្រាប់បណ្តាខេត្តផ្សេងៗទៀត នឹងត្រូវប្រកាសនៅថ្ងៃទី១០ ខែកញ្ញា ស្អែកនេះ។
លទ្ធផលនៃការបោះពុម្ពនេះ ប្រព្រឹត្តឡើងក្រោមការត្រួតពិនិត្យដោយផ្ទាល់របស់លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងមានការចូលរួមសង្កេតការណ៍ពីសំណាក់មន្ត្រីអង្គភាពប្រឆាំងអំពើពុករលួយផងដែរ។
ដំបូងឡើយ ក្រសួងអប់រំគ្រោងនឹងប្រកាសលទ្ធផល ការប្រឡងសញ្ញាបត្របាក់ឌុបនេះ នៅថ្ងៃទី១១ និង១២ ខែកញ្ញា ឆ្នាំ២០១៨ ប៉ុន្តែពេលនេះត្រូវបានកែសម្រួល មុនពេលកំណត់មួយថ្ងៃ។
ការប្រឡងសម្រាប់ឆ្នាំសិក្សា២០១៨នេះ មានបេក្ខជនបានចុះឈ្មោះប្រឡងសរុបចំនួន១១៥,២៦៨នាក់ ស្រី៥៨,១៥៨ នាក់ និងមានមណ្ឌលប្រឡងចំនួន ១៩៦មណ្ឌល ក្នុងនោះថ្នាក់វិទ្យាសាស្ត្រ មាន៩៩មណ្ឌល និងថ្នាក់វិទ្យាសាស្ត្រសង្គមមាន៩៧មណ្ឌល ត្រូវជា៤,៦៥៥បន្ទប់ ទូទាំងប្រទេស៕
