(កំពង់ធំ)៖ កម្មករវ័យក្មេងរបស់រោងម៉ាស៊ីនស្រូវ ក្រុមហ៊ុន LBN ម្នាក់បានស្លាប់នៅពេលបញ្ជូន ទៅកាន់មន្ទីរពេទ្យបង្អែកស្រុកស្ទោង បន្ទាប់ពីរូបគេបានចុះយកដែក ដែលធ្លាក់ចូលក្នុងតៅបង្ហូរអង្កាម ជម្រៅ២៥០សង់ទីម៉ែត្រ ពេលចុះទៅដល់បាតតៅ ត្រូវអង្កាមដែលនៅលើរអិលបាកចូលសង្កត់ពីលើ។ ហេតុការណ៍នេះកើតឡើង នៅវេលាម៉ោង១០៖២០នាទីថ្ងៃទី០៧ ខែកញ្ញា ឆ្នាំ២០១៨ នៅចំណុចក្រុមហ៊ុនLBN អង្ករកម្ពុជា​ ស្ថិតនៅស្រុកស្ទោង ខេត្តកំពង់ធំ។

យោងតាមសមត្ថកិច្ចបានឱ្យដឹងថា ជនរងគ្រោះឈ្មោះ​ចន​ សុភ័ក្រ ភេទប្រុស អាយុ16ឆ្នាំ រស់នៅភូមិត្រាច​ ឃុំកំពង់ចិនជើង ស្រុកស្ទោង ខេត្តកំពង់ធំ។ ​​​​​​​​​តាមការបំភ្លឺពីសាក្សីឈ្មោះ ង៉ែត​ ងួន ភេទ​ប្រុស​ អាយុ៤៥ឆ្នាំ ជាកម្មកររោងម៉ាស៊ីនបានបញ្ជាក់ឱ្យដឹងថា ​ជនរងគ្រោះបានចុះយកដែក ដែលធ្លាក់ចូលក្នុងតៅបង្ហូអង្កាម ជម្រៅ២៥០សង់ទីម៉ែត្រ ពេលចុះទៅដល់បាតតៅ ត្រូវអង្កាមដែលនៅលើរអិលបាកចូលសង្កត់ពីលើ ភ្លាមៗនោះខ្លួនក៏បានហៅកម្មករនៅក្បែរៗនោះ ជាច្រើននាក់មកជួយកាយអង្កាមយកជនរងគ្រោះ ប្រហែលជាង២០នាទី ទើបយកជនរងគ្រោះបាន តែជនរងគ្រោះបានសន្លប់បាត់ស្មារតីទៅហើយ ភ្លាមៗនោះ​ក៏ប្រញាប់ប្រញាល់យកជន​រងគ្រោះទៅមន្ទីពេទ្យស្រុកស្ទោង ពេលដល់ពេទ្យ គ្រូពេទ្យបានប្រាប់ថាជនរងគ្រោះស្លាប់បាត់ទៅហើយ។

សមត្ថកិច្ចបន្តថា បើយោងតាមការពិនិត្យនៅកន្លែងកើតហេតុ និងសាកសព អាចសន្និដ្ឋានបានថា​ ជនរងគ្រោះស្លាប់ដោយកាថប់ដង្ហើម។
បន្ទាប់ពីពិនិត្យរួចសាកសពត្រូវបានប្រគល់ជូនក្រុមគ្រួសារសពយកទៅធ្វើបុណ្យតាមប្រពៃណី៕