(ភ្នំពេញ)៖ នាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដែលត្រូវព្រះមហាក្សត្រចេញព្រះរាជក្រឹត្យ ត្រាស់បង្គាប់ដាក់ឲ្យចូលនិវត្តន៍នោះ នៅពេលនេះត្រូវបានតែងតាំងជាអនុរដ្ឋលេខាធិការ ក្រសួងមហាផ្ទៃ។ នេះបើយោងតាមព្រះរាជក្រឹត្យ ត្រាស់បង្គាប់តែងតាំងថ្នាក់រដ្ឋលេខាធិការ សម្រាប់អាណត្តិទី៦ ដែលបណ្តាញព័ត៌មាន Fresh News ទទួលបាននៅថ្ងៃទី៦ ខែកញ្ញា ឆ្នាំ២០១៨។
សូមបញ្ជាក់ថា នាយឧត្តមសេនីយ៍ ជួន សុវណ្ណ ត្រូវបានឡើងកាន់តំណែងជាស្នងការនគរបាលរាជធានីភ្នំពេញ នៅអំឡុងឆ្នាំ២០១២ ជំនួសតំណែងលោកឧត្តមសេនីយ៍ ទូច ណារ៉ុថ ដែលត្រូវបានតែងតាំងជាប្រធាននាយកដ្ឋានអង្គរក្ស ក្រសួងមហាផ្ទៃ និងបន្ទាប់មកត្រូវតម្លើងជាអគ្គស្នងការរងនគរបាលជាតិ។
ជាការកត់សម្គាល់ ក្នុងរយៈពេល នៃការកាន់តំណែងប្រមាណ៦ឆ្នាំ របស់នាយឧត្តមសេនយ៍ ជួន សុវណ្ណ, លោកមានស្នាដៃជាច្រើនលើកិច្ចការរក្សាសន្តិសុខ សុវត្ថិភា និងសណ្តាប់ធ្នាប់សាធារណៈ តាមមូលដ្ឋាននៅក្នុងរាជធានីភ្នំពេញ ពាក់ព័ន្ធនឹងការបង្ក្រាបបទល្មើសផ្សេងៗ ក៏ដូចជា ការទប់ស្កាត់បាតុកម្ម កុប្បកម្ម និងកូដកម្មពីសំណាក់ការប្រឆាំងតវ៉ាពីក្រុមប្រឆាំង និងអង្គការសង្គមស៊ីវិលផ្សេងៗ ដែលមានចរិកបំផ្លាញរបៀបរៀបរយនៅក្នុងរាជធានីភ្នំពេញ។
ជាពិសេសនោះ កងកម្លាំងនគរបាលរាជធានីភ្នំពេញ ក្រោមការបញ្ជាផ្ទាល់ពីនាយឧត្តមសេនីយ៍ ត្រូវបានគេមើលឃើញថា មានភារកិច្ចដ៏សំខាន់លើការទប់ស្កាត់ចលនាប្រឆាំង ដង្ហែក្បួនរបស់អតីត គណបក្សសង្គ្រោះជាតិ ក្រោយការបោះឆ្នោតនៅឆ្នាំ២០១៣កន្លងទៅ ដែលនោះបានធ្វើឲ្យបញ្ហាសន្តិសុខ និងសណ្តាប់ធ្នាប់សាធារណៈមានការព្រួយបារម្ភយ៉ាងខ្លាំង បើគ្មានវត្តមានឈរជើង របស់កងកម្លាំងនគរបាលទេនោះ៕