(ភ្នំពេញ)៖​ ប្រជាពលរដ្ឋ និងអ្នកគាំទ្រកម្ពុជា ប្រហែលជាបានស្គាល់ច្បាស់ ក្រោយកីឡាករម៉ូតូទឹកដ៏ឆ្នើម សាលី អ៊ូមើត ដណ្ដើមបានមេដាយមាស១ និងសំរឹទ្ធ១​ ពីព្រឹត្តិការណ៍កីឡាអាស៊ី Asian Games លើកទី១៨ នៅឥណ្ឌូនេស៊ី ។ ប៉ុន្ដែមុនទទួលបានភាពជោគជ័យ និងជួយកម្ពុជា បំបែកឯតទគ្គកម្ម ៦៤ឆ្នាំក្នុងព្រឹត្តិការណ៍នេះ អ៊ូមើត ធ្លាប់ដណ្ដើមបានមេដាយលើឆាកអន្ដរជាតិមិនស្ទើរនោះទេ តែក្នុងនោះមានរឿងមួយ ដែលកីឡាករវ័យ ២៦ឆ្នាំរូបនេះ បានធ្វើឲ្យពិភពលោកភ្ញាក់ផ្អើល និងទទួលស្គាល់រូបគេ គឺជាជើងខ្លាំង ។

សាលី អ៊ូមើត បានរំលឹកថា ក្រោយវិវត្តន៍ខ្លួនក្លាយជាកីឡាករម៉ូតូទឹក គេបានឆ្លងកាត់ឧបសគ្គជាច្រើន ហើយរឿងមួយ ដែលខ្លួនចាំមិនភ្លេច គឺកាលពីឆ្នាំ២០១៣ ក្នុងការប្រកួតជើងឯកពិភពលោក នៅអាមេរិក រូបគេត្រូវបានគណៈកម្មការពិន័យដាក់សោរលើក្បាល ហើយអនុញ្ញាតឲ្យចេញដំណើរក្រោយគេ តែគេបានព្យាយាមរហូតដណ្ដើមបានជើងឯកមកវិញ ។ អ៊ូមើត និយាយថា «ឆ្នាំ២០១៣ ប្រកួតនៅអាមេរិក ខ្ញុំចាំមិនភ្លេចទេ ពេលនោះខ្ញុំត្រូវបានគណៈកម្មការពិន័យដាក់សោរលើក្បាល ហើយឲ្យម៉ូតូគូប្រជែង ៣៥គ្រឿងទៀត ចេញដំណើរទៅមុន បន្ទាប់មកទើបឲ្យខ្ញុំយកសោរចាក់ម៉ូតូជិះតាមក្រោយ» ។

អ៊ូមើត បានបន្ដថា «ពេលនោះ ខ្ញុំក៏ប្រកួតវិញ្ញាសាស្គីឈរ(Ski Modified) ដូចប្រកួតកីឡាអាស៊ីដែរ តែពេលគេពិន័យខ្ញុំ បានធ្វើឲ្យខ្ញុំកាន់តែមានឆន្ទៈប្រកួត ទោះបីខ្ញុំចេញដំណើរក្រោយគេ តែខ្ញុំបានវ៉ាកីឡាករម្នាក់ម្ដងៗ រហូតវ៉ាកីឡាករនាំមុខគេនៅជុំចុងក្រោយ ដើម្បីគ្រងជើងឯក ។ ខ្ញុំមានមោទនភាពណាស់ពេលនោះ ហើយកីឡាករខ្លាំងៗ រួមទាំងអ្នកគាំទ្រកីឡាម៉ូតូទឹកលើពិភពលោកក៏បានសម្ដែងនូវការភ្ញាក់ផ្អើល ចំពោះរូបខ្ញុំ និងបានកោតសរសើរខ្ញុំ ក៏ដូចជាទទួលស្គាល់ខ្ញុំគឺជាកីឡាករមានសមត្ថភាព ចាប់ពីពេលនោះមក» ។ ជុំវិញរឿងនេះ លោក ណុះ ស្លេះ ប្រធាននសហព័ន្ធកីឡាម៉ូតូទឹកកម្ពុជា ក៏បានថ្លែងយ៉ាងដូច្នេះផងដែរ ។

យ៉ាងណាមិញកេរ្តិ៍ឈ្មោះរបស់ អ៊ូមើត បច្ចុប្បន្ន គឺកាន់តែល្បីល្បាញបន្ថែមទៀត បន្ទាប់ពីគេដណ្តើមបាននូវមេដាយមាស និងសំរឹទ្ធ ជាប្រវត្តិសាស្ត្រជូនជាតិ រហូតទទួលបានការកោតសរសើរពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដូចគ្នានិងកីឡាការិនី ខាន់ ចេសា ដែលដណ្តើមបានមេដាយមាស ១គ្រឿងផងដែរ ។

មិនតែប៉ុណ្ណោះ ទាំងកីឡាករ និងកីឡាការិនីទាំងពីរ ក៏ត្រូវបានប្រជាពលរដ្ឋទូទាំងប្រទេស សម្តែងនូវមោទនភាព ស្ងើចសរសើរ និងអបអរសាទរ ហើយក្រុមហ៊ុនវិស័យឯកជនមួយចំនួន ចូលរួមឧបត្ថម្ភជាបន្តបន្ទាប់ផងដែរ ។ អ្វីដែលពិសេសទាំង អ៊ូមើត និង ចេសា សុទ្ធតែទទួលបានប្រាក់រង្វាន់រាប់ម៉ឺនដុល្លារពីរាជរដ្ឋាភិបាល និងសម្ដេចតេជោនាយករដ្ឋមន្ដ្រីទៀតផង៕