(កំពង់ចាម)៖ ​អភិបាលខេត្តកំពង់ចាម លោក គួច ចំរើន ​និងលោកស្រី នៅព្រឹកថ្ងៃទី០៥ ខែកញ្ញា ឆ្នាំ២០១៨នេះ បាន​អញ្ជើញ​សំណេះសំណាល សួរសុខទុក្ខ និងចែកអំណោយរបស់អង្គការ មូលនិធិពុទ្ធសាសនា ឆឺ ជី ដល់ប្រជាពលរដ្ឋ​ដែលរងគ្រោះដោយទឹកជំនន់ទន្លេមេគង្គ ចំនួន​៨១៩គ្រួសារ នៅឃុំព្រែកកក់ និងឃុំព្រែកបាក់ ក្នុងស្រុកស្ទឹងត្រង់​។​

ក្នុងពិធីនោះ ក៏មានការចូលរួមពី ​លោក កៅ សុខអាន, លោក ហេង វ៉ាន់នី អភិបាលរងខេត្ត, លោកឧត្តមសេនីយ៍ទោ ឯម កុសល ស្នងការនគរបាលខេត្ត, លោកអភិបាល-អភិបាលរងស្រុកស្ទឹងត្រង់, អស់លោក-លោកស្រីប្រធាន-អនុប្រធានមន្ទីរ, ប្រធានអង្គការមូលនិធិពុទ្ធសាសនា ឆឺ ជី និងសហការី, តំណាងសហភាពសហព័ន្ធយុវជនកម្ពុជា ប្រចាំខេត្តកំពង់ចាម, តំណាងសមាគមគ្រូពេទ្យស្ម័គ្រចិត្តសម្ដេចតេជោ និងមន្ត្រីរាជការជាច្រើនរូបទៀត។

នៅក្នុងឱកាសនោះលោក គួច ចំរើន បាន​នាំការសួរសុខទុក្ខរបស់សម្ដេចកិត្ដិព្រឹទ្ធបណ្ឌិត ប៊ុន​ រ៉ានី ហ៊ុនសែន ប្រធានកាកបាទក្រហមកម្ពុជា ដោយស្នើដល់អាជ្ញាធរ ត្រូវតែជួយសង្គ្រោះពលរដ្ឋ គ្រប់ពេលវេលា ដោយមិនប្រកាន់ពូជសាសន៍ សម្បុរ ​ឬនិន្នាការនយោបាយអ្វីឡើយ គឺដើម្បីជួយសម្រាលរាល់ទុក្ខលំបាករបស់ពួកគាត់ ឲ្យទាន់ពេលវេលា។

លោកអភិបាលខេត្តកំពង់ចាម បានលើកឡើងបន្ថែមទៀតថា ការចែកអំណោយនៅពេលនេះ ដើម្បីចូលរួមចំណែកដោះស្រាយជីវភាពរបស់បងប្អូន បានមួយកំរិត សំដៅការអភិវឌ្ឍន៍ រួមចំណែកលើកកម្ពស់ជីវភាព របស់បងប្អូនឲ្យកាន់តែល្អថែមទៀត បើទោះបីសម្ភារ និងថវិកាទាំងនេះ មិនបានបំពេញតាមតំរូវការរបស់បងប្អូនក៏ពិតមែន ក៏អាចដោះស្រាយបានមួយកំរិតផងដែរ។

លោកក៏បានផ្តាំដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ពីសុវត្ថិភាពផ្ទាល់ខ្លួន និងក្រុមគ្រួសារដោយរដូវនេះ ដែលងាយបង្កគ្រោះថ្នាក់ ហើយបើបងប្អូនមានកើតបញ្ហាអ្វីកើតឡើង ក្នុងគ្រួសារត្រូវរាយការណ៍អាជ្ញាធរមូលដ្ឋាន ដែលនៅជិតកៀកជាមួយបងប្អូនផ្ទាល់ ដើម្បីឱ្យក្រុមការងារចុះជួយដល់បងប្អូនឆាប់រហ័ស និងទាន់ពេលវេលា៕