(កំពង់ធំ)៖ លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជាខេត្តកំពង់ធំ នៅថ្ងៃទី០៣ ខែកញ្ញា ឆ្នាំ២០១៨នេះ បានដឹកនាំសហការី បន្តចុះទៅប្រគល់ផ្ទះចំនួន០១ខ្នង ជូនដល់អតីតយុទ្ធជនពិការ ស្ថិតនៅភូមិឈូកខ្សាច់ឃុំឈូកខ្សាច់ស្រុកបារាយណ៍ខេត្តកំពង់ធំ។
ផ្ទះថ្មីដែលទើបសាងសង់រួច និងប្រគល់ជូនគាត់នៅពេលនេះមានទំហំ ៤ម៉ែត្រ គុណ៦ម៉ែត្រ សាងសង់ពីឈើជញ្ជាំង និងរនាបក្តារ ដំបូងស័ង្កសី ខ្ពស់ផុតពីដីដែលបានចំណាយថវិកា ក្នុងការសាងសង់អស់ទឹកប្រាក់៦,៨៧០,០០០រៀល។
អតីតយុទ្ធជនឈ្មោះ ហ៊ន សា ឋានន្តរស័ក្ដិពលបាលឯក បានចូលរួមបម្រើក្នុងជួរកងទ័ពនៅថ្ងៃទី១៥ ខែឧសភា ឆ្នាំ១៩៨៩ នៅអតីតអង្គភាពវរសេនាតូចលេខ៣០ នៃយោធាខេត្តកំពង់ធំ។ លោកពលបាលឯក ហ៊ន សា បានរងរបួសនៅសមរភូមិពាមអាទិត្យ ឃុំសាគ្រាមស្រុកប្រាសាទបល្ល័ង្កនៅថ្ងៃទី២០ ខែតុលាឆ្នាំ១៩៩៣។
លោកពលបាលឯក ហ៊ន សាអាយុ៤៥ឆ្នាំមានភរិយាឈ្មោះ ឈិន ថីអាយុ៣៦ឆ្នាំ មានកូនចំនួន២នាក់ នៅក្នុងបន្ទុក គ្រួសារអតីតយុទ្ធជនពិការនេះបានរស់នៅជ្រកកោនជាមួយបងប្អូនជិតខាង ដោយគាត់ពុំមានផ្ទះសម្បែងស្នាក់នៅឡើយ។
ក្នុងពិធីសំណេះសំណាល និងប្រគល់ផ្ទះថ្មីនេះ លោកនិងក្រុមការងារសមាគមអតីតយុទ្ធជនខេត្តកំពង់ធំបាននាំយកមកនូវអំណោយរបស់សម្ដេចតេជោ ហ៊ុន សែន ផ្តល់ជូនគាត់បន្ថែមទៀតរួមមាន អង្ករចំនួន៥០គីឡូក្រាម, មីយើងចំនួន០២កេស, ទឹកទឹកត្រីទឹកស៊ីអ៊ីវ ចំនួន ០២ យួរ, មុងជ្រលក់ថ្នាំចំនួន០២ និងថវិកាចំនួន២២១,០០០រៀលផងដែរ៕
