(សៀមរាប)៖ លោកទេសរដ្ឋមន្ត្រី ជា សុផារ៉ា អនុប្រធានទី១ ក្រុមការងារថ្នាក់កណ្តាលគណបក្សប្រជាជនកម្ពុជា ចុះជួយខេត្តត្បូងឃ្មុំ និងជាប្រធានក្រុមការងារចុះជួយក្រុងសួង ស្រុកត្បូងឃ្មុំ ស្រុកក្រូចឆ្មារ និងស្រុកមេមត់ នៃខេត្តត្បូងឃ្មុំ បានចំណាយថវិកាផ្ទាល់ខ្លួន ដើម្បីនាំសមាជិកគណបក្សប្រជាជនកម្ពុជាជិត៤០០០នាក់ ទៅទស្សនាប្រាសាទអង្គរវត្ត រយៈពេល៣ថ្ងៃ។
សមាជិកគណបក្សប្រជាជនកម្ពុជា ដែលត្រូវបានឧបត្ថម្ភឲ្យចូលរួមទស្សនកិច្ចដ៏ធំនេះ រួមមាន៖ ស្រុកត្បូងឃ្មុំ១៧៣១នាក់, ស្រុកក្រូចឆ្មារ ៨២៧នាក់, ស្រុកមេមត់ ១០៨៩នាក់, និងក្រុងសួង ១៨៩នាក់ ដែលមានគ្នាសរុប ៣៨៣៦ នាក់ និង ៩១ឡានក្រុង។
ក្នុងដំណើរកំសាន្តនេះ ត្រូវបានធ្វើឡើង ដើម្បីថ្លែងអំណរគុណដល់ប្រជាពលរដ្ឋ ក៏ដូចជាសមាជិកគណបក្សប្រជាជនកម្ពុជាទាំងអស់ ដែលបានប្រឹងប្រែងនាំមកនូវជ័យជម្នះជូនបក្ស ក្នុងព្រឹត្តិការបោះឆ្នោតជាតិឆ្នាំ២០១៨ កន្លងទៅ។ កម្មវិធីនេះ ក៏ត្រូវបានធ្វើឡើងរយៈពេល២យប់ ៣ថ្ងៃ ហើយលោកទេសរដ្ឋមន្ត្រី បាននាំសមាជិកបក្សក្នុងមួយស្រុកម្តងៗ ទៅកំសាន្តក្រុងអង្គរនេះ ដោយចែកចេញជា ៤ដំណាក់កាល។
ប្រជាពលរដ្ឋមានក្តីសប្បាយរីករាយយ៉ាងក្រៃលែង ព្រោះក្នុងចំណោមអ្នកដំណើរកំសាន្តទាំងអស់ ប្រហែល៩០ភាគរយមិនដែលបានទៅទស្សនាសៀមរាប ជាពិសេសអង្គរវត្តនោះទេ។ ដោយមានការណែនាំពីលោកទេសរដ្ឋមន្ត្រី ជា សុផារ៉ា ពួកគាត់ បានច្រៀងបទគោរពទង់ជាតិ និងបទពង្សាវតារខ្មែរ នៅចំពោះមុខប្រាសាទអង្គរតូច ដែលធ្វើឲ្យភ្ញៀវទេសចរណ៍ជាតិ និងអន្តរជាតិមានការចាប់អារម្មណ៍យ៉ាងខ្លាំង និងបានថតរូបយ៉ាងអ៊ូអរផងដែរ៕
