(ភ្នំពេញ)៖ អភិបាលរងខណ្ឌព្រែកព្នៅម្នាក់ គឺលោក ទូច សាលីន និងភរិយាឈ្មោះ សំ ឡាលីន បានរងការចោទប្រកាន់ថា បានធ្វើកិច្ចសន្យាយល់ព្រមលក់ផ្ទះចំនួន២ល្វែង នៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ដែលមានតម្លៃជិតកន្លះលានដុល្លារ រហូតទទួលបានប្រាក់កក់ និងប្រាក់ផ្ដល់ដំណាក់កាលទី១ ពីភាគីអ្នកទិញចំនួនជាង១៨ម៉ឺនដុល្លារ តែបែរជារត់ទៅប្ដឹងតុលាការ សុំឲ្យរំលត់កិច្ចសន្យាទិញលក់ផ្ទះនេះវិញ គោលបំណងចង់ស៊ីដាច់លុយកក់ និងប្រាក់ផ្ដល់ដំណាក់កាលទី១ ពីភាគីអ្នកទិញ។
ការចោទប្រកាន់ទៅលើអភិបាលរងខណ្ឌព្រែកព្នៅ រាជធានីភ្នំពេញរូបនេះ បានធ្វើឡើងពីសំណាក់លោក ចាន់ សុវណ្ណារ៉ា តំណាងក្រុមហ៊ុន សែនសុខ សុវណ្ណអភិវឌ្ឍន៍ និងស្ដ្រីជនជាតិចិនម្នាក់ទៀត។
យោងតាមកិច្ចសន្យាទិញលក់ផ្ទះ រវាងភាគីទាំង២ ដែលធ្វើឡើងកាលពីថ្ងៃទី៣០ ខែមីនា ឆ្នាំ២០១៨ ដែលអង្គភាពព័ត៌មាន Fresh News ទទួលបាននៅថ្ងៃទី១ ខែកញ្ញានេះ បានបញ្ជាក់ថា លោក ទូច សាលីន និងភរិយា បានយល់ព្រមលក់ផ្ទះចំនួន២ល្វែង នៅក្រុមទី៧ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ដែលមានតម្លៃ៤៨៥,០០០ដុល្លារ។
នៅក្នុងកិច្ចសន្យា ដែលមានការទទួលស្គាល់ និងដឹងលឺពីមេធាវី ប៊ុន កែវលីម បានបញ្ជាក់ទៀតថា តំណាងអ្នកទិញត្រូវប្រគល់ប្រាក់ជាបីដំណាក់កាល គឺដំណាក់កាលទី១៖ ជាការកក់ប្រាក់២ម៉ឺនដុល្លារ, ដំណាក់កាលទី២៖ បង់បន្ថែមថ្លៃទិញ១៦៥,០០០ដុល្លារ នៅថ្ងៃទី៣០ ខែមីនា ឆ្នាំ២០១៨ និងដំណាក់កាលទី៣៖ ភាគីអ្នកទិញត្រូវប្រគល់ប្រាក់ផ្ដាច់ថ្លៃផ្ទះចំនួន៣០ម៉ឺនដុល្លារ នៅពេលភាគីអ្នកលក់ បានរត់ការផ្ទេរប័ណ្ណកម្មសិទ្ធិ រួចរាល់ជាស្ថាពរ មកឲ្យភាគីអ្នកទិញ។
ប៉ុន្ដែក្រោយភាគីអ្នកទិញ បានកក់ប្រាក់២ម៉ឺនដុល្លារ និងបង់ថ្លៃបន្ថែម១៦៥,០០០ដុល្លាររួច ស្រាប់តែលោក ទូច សាលីន និងភរិយា បែរជាគេចវេសមិនព្រមរត់ការផ្ទេរឈ្មោះ ជូនអ្នកទិញថែមទាំងរត់ទៅ ប្ដឹងតុលាការសុំរំលាយកិច្ចសន្យាទៀតផង ពោលមានបំណងចង់ស៊ីដាច់ប្រាក់កក់ និងប្រាក់បង់ថ្លៃបន្ថែមសរុបជិត២០ម៉ឺនដុល្លារ។
ដោយមើលឃើញពីទង្វើរបស់អភិបាលរងខណ្ឌព្រែកព្នៅ និងភរិយាខាងលើនេះ អ្នកទិញបានរត់ទៅប្ដឹងប្រធានសាលាដំបូងរាជធានីភ្នំពេញ កាលពីដើមខែសីហា ដើម្បីសុំចេញដីកាសម្រេច រក្សាការពារផ្ទះទាំង២ល្វែងនេះ។
ភាគីអ្នកទិញសុំអំពាវនាវចំនួន២ចំណុច គឺទី១៖សុំឲ្យលោក ទូច សាលីន និងភរិយា ដែលជាភាគីអ្នកលក់ផ្ទះ ត្រូវគោរពតាមកិច្ចសន្យាទិញលក់ផ្ទះ ដែលមានស្នាមមេដៃ និងការទទួលស្គាល់ពី មេធាវីបានត្រឹមត្រូវ និងទី២៖ ស្នើឲ្យក្រសួងមហាផ្ទៃ ក៏ដូចជា សាលារាជធានីភ្នំពេញ ផ្អាកការងារលោកអភិបាលរងរូបនេះ ជាបណ្ដោះអាសន្នសិន ដើម្បីទុកផ្លូវឲ្យតុលាការធ្វើការដោះស្រាយតាមនីតិវិធីច្បាប់។
ចំពោះការលើកឡើងរបស់ភាគីអ្នកទិញផ្ទះ អង្គភាពព័ត៌មាន Fresh News មិនទាន់បានទំនាក់ទំនងសុំការបកស្រាយពីលោក ទូច សាលីន និងភរិយា បាននៅឡើយទេ នៅថ្ងៃទី០១ ខែកញ្ញា ឆ្នាំ២០១៨នេះ៕
