(ភ្នំពេញ)៖ លោក ទ្រី តៃហ៉ី មន្ត្រីគ្រប់គ្រងនៃផ្សារមូលបត្រកម្ពុជា (CSX) បានប្រកាសថា CSX នឹងផ្តល់មន្ត្រីជំនាញដើម្បីបើកសិក្ខាសាលា ដល់សាកលវិទ្យាល័យនានា ទូទាំងប្រទេសកម្ពុជា ប្រសិនបើសាកលវិទ្យាល័យនោះ ចង់ផ្តល់ចំណេះដឹងអំពីផ្សារភាគហ៊ុនសម្រាប់និស្សិតរបស់ខ្លួន។
លោក ទ្រី តៃហ៉ី បានថ្លែងបែបនេះ នៅថ្ងៃទី២៩ ខែសីហា ឆ្នាំ២០១៨ ក្នុងឱកាសដែល CSX បានរៀបចំសិក្ខាសាលាពិសេសសម្រាប់សាស្ត្រាចារ្យ ស្តីពី «ទីផ្សារមូលបត្រកម្ពុជា» នៅអគារ CSX ដោយមានការចូលរួមជាអធិបតីពីសំណាក់លោក HA Jong Weon អគ្គនាយករងនៃ CSX ។ សិក្ខាសាលានេះ ត្រូវបានចូលរូមដោយសាស្ត្រាចារ្យចំនួន៤៤រូប ដែលអញ្ជើញមកពីសាកលវិទ្យាល័យចំនួន៨ នៅក្នុងរាជធានីភ្នំពេញ។
មន្ត្រីគ្រប់គ្រង CSX រូបនេះ បានបញ្ជាក់យ៉ាងដូច្នេះថា «ផ្សារមូលបត្រកម្ពុជា រីករាយក្នុងការសហការជាមួយសាកលវិទ្យាល័យនានាទូទាំងប្រទេសកម្ពុជា ក្នុងការផ្តល់ចំណេះដឹងទាក់ទងនឹងវិស័យមូលបត្រដល់និស្សិត។ ផ្សារមូលបត្រកម្ពុជាអាចផ្តល់មន្ត្រីជំនាញ ដើម្បីធ្វើសិក្ខាសាលា ឬបើកជាថ្នាក់សិក្សា ដល់សាកលវិទ្យាល័យ ដែលមានចំណាប់អារម្មណ៍»។
លោក ទ្រី តៃហ៉ី បានបញ្ជាក់ទៀតថា «លើសពីនេះទៅទៀត ផ្សារមូលបត្រកម្ពុជាក៏រីករាយក្នុងការចុះអនុស្សរណៈយោគយល់គ្នា ជាមួយសាកលវិទ្យាល័យ ដើម្បីឲ្យការអភិវឌ្ឍធនធានមនុស្ស លើវិស័យមូលបត្រកាន់តែមានភាពប្រសើរឡើង»។
បើតាមលោក ទ្រី តៃហ៉ី មូលហេតុដែល CSX សម្រេចបែបនេះ ក្នុងគោលបំណងលើកកម្ពស់ចំណេះដឹងក្នុងវិស័យមូលបត្រ និងបញ្ជ្រាបការយល់ដឹងនេះ ដល់គ្រឹះស្ថានអប់រំនានា ជាពិសេសតាមសាកលវិទ្យាល័យ ដើម្បីឲ្យនិស្សិតកាន់តែមានចំណេះដឹងលើវិស័យនេះ។
ថ្លែងក្នុងពិធីនេះ លោកអគ្គនាយករងនៃ CSX បានឲ្យដឹងថា ផ្សារមូលបត្រកម្ពុជា កំពុងខិតខំប្រឹងប្រែងយ៉ាងខ្លាំង ដើម្បីទាក់ទាញក្រុមហ៊ុនបោះផ្សាយមូលបត្រ និងអ្នកវិនិយោគដែលមានសក្តានុពល ក្នុងគោលបំណងអភិវឌ្ឍផ្សារមូលបត្រកម្ពុជា ឲ្យកាន់តែមានសកម្មភាពជួញដូរកាន់តែច្រើន។
លោក HA Jong Weon បានបន្ថែមថា កម្មវិធីនៅថ្ងៃនេះ នឹងចូលរួមចំណែកយ៉ាងសំខាន់ក្នុងការលើកកំពស់ការយល់ដឹង ពីវិស័យមូលបត្រទៅដល់សាស្រ្តាចារ្យទាំងអស់ ដែលមានវត្តមាននៅទីនេះ និងសង្ឃឹមយ៉ាងមុតមាំថា ចំណេះដឹងទាក់ទងនឹងវិស័យថ្មីមួយនេះ នឹងត្រូវបានផ្សព្វផ្សាយបន្ដទៅដល់សាធារណជន និងជាពិសេសនិស្សិតតាមសាកលវិទ្យាល័យនានាផងដែរ។
លោកអគ្គនាយករង ដែលជាជនជាតិកូរ៉េរូបនេះ ក៏ធ្លាប់បានប្រាប់ Fresh News ឲ្យដឹងដែរថា លោកនឹងធ្វើឲ្យផ្សារភាគហ៊ុននៅក្នុងប្រទេសកម្ពុជា មានសន្ទុះឡើងខ្លាំង នៅក្នុងរយៈពេល ៣ឆ្នាំទៀតែប៉ុណ្ណោ៕
