(ភ្នំពេញ)៖ លោក នុត ពុធដារ៉ា ជំនួយការសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាអភិបាលខណ្ឌដង្កោ នៅថ្ងៃទី៣០ ខែសីហា ឆ្នាំ២០១៨នេះ បានបន្តចុះថ្លែងអំណរគុណប្រជាពលរដ្ឋ បញ្ចប់គ្រប់សង្កាត់ទាំង១៣ របស់ខណ្ឌដង្កោ ដែលបានបោះឆ្នោតជូនគណបក្សប្រជាជនកម្ពុជា ព្រមទាំងទទួលយកសំណើ សំណូមពរ និងដោះស្រាយបញ្ហានានាជូនប្រជាពលរដ្ឋ ក្នុងសង្កាត់សាក់សំពៅ។
លោកអភិបាលខណ្ឌ បានធ្វើការថ្លែងអំណរគុណ យ៉ាងជ្រាលជ្រៅចំពោះប្រជាពលរដ្ឋទាំងអស់ ដែលបានគាំទ្រ និងបោះឆ្នោតជូនគណបក្សប្រជាជនកម្ពុជា ឲ្យទទួលបានជ័យជម្នះភ្លូកទឹកភ្លូកដី គាំទ្រសម្តេចតេជោ ហ៊ុន សែន បន្តធ្វើជានាយករដ្ឋមន្ត្រី ដើម្បីថែរក្សាសុខសន្តិភាព និងបន្តការអភិវឌ្ឍប្រទេសជាតិ ឲ្យបានរីកចម្រើនឡើង ដោយនៅក្នុងខណ្ឌដង្កោ ប្រជាពលរដ្ឋបានបោះឆ្នោតគាំទ្រគណបក្សប្រជាជនទទួលបាន៧១,២១% ធៀបនឹងចំនួនអ្នកបោះឆ្នោតសរុប។
លោក នុត ពុធដារ៉ា ក៏បានផ្តាំផ្ញើរការសាកសួរសុខទុក្ខប្រជាពលរដ្ឋ ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនដល់ប្រជាពលរដ្ឋទាំងអស់ ដែលជានិច្ចកាលសម្តេចទាំងទ្វេរតែងបានគិតគូរពីការលំបាក បញ្ហាកង្វល់ និងតម្រូវការនានារបស់បងប្អូននៅមូលដ្ឋាន។
ថ្នាក់ដឹកនាំខណ្ឌដង្កោរូបនេះ ក៏បានប្តេជ្ញាចិត្តចំពោះប្រជាពលរដ្ឋទាំងអស់ នឹងដោះស្រាយរាល់ការសន្យានានា ជាមួយពលរដ្ឋដែលនៅសេសសល់ មុនពេលបោះឆ្នោត ឲ្យបានចប់សព្វគ្រប់ដើម្បីជាការឆ្លើយតប នូវការគាំទ្ររបស់ប្រជាពលរដ្ឋចំពោះគណបក្សប្រជាជនកម្ពុជា។
ក្នុងឱកាសនោះ លោកអភិបាល បានណែនាំដល់មន្ត្រីក្រោមឱវាទទាំងអស់ ត្រូវបម្រើ និងផ្តល់សេវាជូនប្រជាពលរដ្ឋឲ្យបានកាន់តែល្អប្រសើរទ្វេរដង ស្របតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលជានិច្ចជាកាលតែងតែណែនាំ និងក្រើនរំលឹកដល់មន្ដ្រីរាជការជានិច្ច៕
