(ប៉ៃលិន)៖ លោក ផាន់ ចាន់ធុល អភិបាលខេត្តប៉ៃលិន បានប្តេជ្ញា​ចិត្តអភិវឌ្ឍន៍សក្តានុពលទេសចរណ៍ក្នុងខេត្ត ឲ្យអស់ពីលទ្ធភាព ដើម្បីទាក់ទាញភ្ញៀវទេសចរជាតិ​ និងអន្តរជាតិ ឲ្យមកកំសាន្តកាន់តែច្រើនឡើង ក្នុងគោលបំណងជំរុញឲ្យមានកំណើន​សេដ្ឋកិច្ចរបស់ខេត្ត និងជីវភាពរបស់ប្រជាពលរដ្ឋ មានការរីកចម្រើនបន្ថែមទៀត។

លោកថ្លែងយ៉ាងដូច្នេះ នៅក្នុងកិច្ចប្រជុំពិភាគ្សា ស្តីពីគម្រោងអភិវឌ្ឍន៍សក្តានុពលអេកូទេសចរណ៍ធម្មជាតិ នៅ​សាលាខេត្ត​ប៉ៃលិន ក្នុងខេត្តប៉ៃលិន នៅថ្ងៃទី២៨ ខែសីហា ឆ្នាំ២០១៨ថា ដើម្បីសម្រេចបានផែនការទាំង​អស់នេះ អាជ្ញាធរខេត្ត នឹងខិតខំបង្កលក្ខណៈងាយស្រួល ក្នុងការ​គៀងគររក​ដៃគូវិនិយោគជាយុទ្ធសាស្ត្រ រយៈពេល​វែង ជាមួយសក្តានុពលរបស់ខេត្តសម្រាប់ពេលអនាគត ជាពិសេសធ្វើការវិ​និយោគ លើតំបន់​ទេសចរណ៍វប្បធម៌ និងធម្មជាតិ ជាច្រើនរបស់ខេត្ត ដែលមិនទាន់បានអភិវឌ្ឍន៍​នៅឡើយនោះផងដែរ។

លោក ផាន់ ចាន់ធុល អភិបាលខេត្តប៉ៃលិន បានឲ្យដឹងយ៉ាងដូច្នេះថា «ខេត្តប៉ៃលិនមានសក្តានុពល​ជាច្រើន ដែលយើងមិនប្រើប្រាស់ឲ្យ​អស់​ពី​លទ្ធភាព និងទាញយកផលប្រយោជន៍​បាននៅ​ឡើយ ដូចជា វិស័យកសិកម្ម វិស័យទេសចរណ៍ជា​ដើម ជាមួយគ្នានេះ​អាជ្ញាធរខេត្ត និងមន្ត្រីជំនាញ ព្រមទាំងគ្រប់ភាគីពាក់ព័ន្ធ ត្រូវសហការគ្នា រួមគ្នា ធ្វើយ៉ាងអភិវឌ្ឍន៍​ខេត្ត និងសេដ្ឋកិច្ចរបស់ប្រជាពលរដ្ឋឲ្យមានការរីកចម្រើន។

លោកបានជំរុញដល់ មន្ទីរអង្គភាពពាក់ព័ន្ធ ត្រូវយកចិត្តទុកដាក់ និងអនុវត្ត​ន៍ឲ្យមានប្រសិទ្ធភាពខ្ពស់ ដែលក្នុងនោះរួមមាន៖ ការអភិវឌ្ឍផលិតផលទេសចរណ៍, ពង្រីកការឃោសនា និងផ្សព្វផ្សាយ​ទេសចរណ៍, ការអភិវឌ្ឍធនធានមនុស្សក្នុងវិស័យទេសចរណ៍, ការសម្រួលការធ្វើដំណើរ និងដឹកជញ្ជូន​ទេសចរណ៍, ការពង្រីកយន្តការគ្រប់គ្រងការអនុវត្តច្បាប់, ការពង្រឹងប្រព័ន្ធសន្តិសុខ, និងសុវត្តិភាពទេសចរណ៍។

នៅក្នុងឱកាសនោះផងដែរ លោក ផាន់ ចាន់ធុល ក៏បានស្នើរដល់មន្ទីរទេសចរណ៍ខេត្ត ត្រូវយកចិត្តទុកដាក់ធ្វើការគ្រប់គ្រង និងអភិវឌ្ឍន៍រមណីយដ្ឋានទេសចរណ៍របស់ខ្លួនឲ្យបានល្អ ដោយត្រូវសហការជាមួយ អាជ្ញាធរគ្រប់ជាន់ថ្នាក់ និងមន្ទីរអង្គភាពពាក់ព័ន្ធ ព្រមទាំងខិតខំស្វែងរក ការវិនិយោគពីផ្នែកឯកជនផងដែរ ជាពិសេសត្រូវខិតខំសិក្សាស្រាវជ្រាវពី សក្តានុពលទេសចរណ៍ និងបុណ្យប្រពៃណីរបស់ខេត្ត ដើម្បីរៀបចំជាព្រឹត្តិការណ៍ទេសចរណ៍ វប្បធម៌ កីឡានានា ដើម្បីបង្ហាញពីវប្បធម៌ប្រពៃណី និងអត្តសញ្ញាណនៅក្នុងតំបន់ និងបង្កើនភាពទាក់ទាញសម្រាប់ខេត្តផងដែរ។

សូមបញ្ជាក់ថា ក្នុងមួយឆ្នាំៗ ភ្ញៀវទេសចរជាតិ និងអន្តរជាតិ បានមកកំសាន្តក្នុងខេត្តប៉ៃលិន គឺមានប្រមាណ ៧៤,៤២២នាក់ ដែលមានរមណីយដ្ឋានធម្មជាតិ និងវប្បធម៌ ដូចជា៖ រមណីយដ្ឋានទឹកធ្លាក់ភ្នំខៀវអូរតាវ៉ៅ, រមណីយដ្ឋានវប្បធម៌ភ្នំយ៉ាត, រមណីយដ្ឋានស្ទឹងភ្នំដំបង, រមណីយដ្ឋានអូរឈើក្រំ, រមណីយដ្ឋានទឹកធ្លាក់ក្បាលដំរី, រមណីយដ្ឋានចំការខ្នុរ, រមណីយដ្ឋានកូលាបប៉ៃលិន, រមណីយដ្ឋានស្ទឹងតារាប, រមណីយដ្ឋានភ្នំកុយ រីសតមែម៉ូរីយ៉ា, រមណីយដ្ឋានអូរអែម និងរមណីយដ្ឋានរហាត់ទឹក, ដោយមានសណ្ឋាគារចំនួន ១០កន្លែង ផ្ទះសំណាក់ចំនួន ១៤កន្លែង សម្រាប់ផ្គត់ផ្គង់ការស្នាក់នៅរបស់ភ្ញៀវទេសចរណ៍ផងដែរ៕