(កណ្តាល)៖ ដោយសង្កេតឃើញពីការយកចិត្តទុកដាក់របស់រដ្ឋបាលខេត្តកណ្ដាល ដោយឡែករដ្ឋបាលស្រុកស្អាង បានគិតគូរដល់ប្រជាពលរដ្ឋ ដោយបានចុះកំណត់រក្សាទុកបឹង ជាទ្រព្យសម្បត្តិសាធារណៈក្នុងភូមិសាស្ត្រស្រុកស្អាងជាច្រើន ដែលការចុះកំណត់នេះធ្វើឡើងក្រោយពីមានការណែនាំ របស់គណៈអភិបាលខេត្តកណ្តាល និងគណៈអភិបាលស្រុកស្អាង។
លោក ញឹម វណ្ណឌិន អភិបាលស្រុកស្អាង បានថ្លែងប្រាប់ភ្នាក់ងារ Fresh News នៅថ្ងៃទី២៨ ខែសីហា ឆ្នាំ២០១៨នេះ ឲ្យដឹងថា ដើម្បីអនុវត្តន៍តាមការណែនាំ ពីលោកអភិបាលខេត្តកណ្តាល ដែលយកចិត្តទុកដាក់ពីការលំបាករបស់ប្រជាពលរដ្ឋនៅក្នុងស្រុកស្អាង ក៏ដូចជាប្រជាពលរដ្ឋទូទាំងខេត្តកណ្តាល កំពុងប្រកបរបរនេសាទ និងកសិកម្មនានា និងបានចុះកំណត់បឹងមួយចំនួនដូចជា៖ បឹងត្នោតមានចំនួន៨៣ហិចតា, បឹងទឹកជោជាង១១ហិចតា, បឹងទទឹងថ្ងៃ ជាង៤១ហិចតា និងបឹងរានមានជាង១៣៦ហិចតា បានចុះបញ្ជីជាទ្រព្យសម្បត្តិរបស់រដ្ឋរួចហើយ និងកំពុងចុះបន្តដើម្បីទៅកំណត់បឹងមួយចំនួនទៀតផងដែរ។
លោកអភិបាលស្រុក បានបន្តថា ការចុះកំណត់នេះ បន្ទាប់ពីបានទទួលមតិដឹកនាំ កាលពីថ្ងៃទី២១ ខែមិថុនាកន្លងមកនេះ អាជ្ញាធរស្រុក បានចុះទៅដកបង្គោល ដែលបានបោះក្នុងបឹង៥០០ មានចំនួនរហូតដល់ជាង២៧០បង្គោល ដោយមានជនខិលខូចបានទន្ទ្រានកាន់កាប់ដីសាធារណៈរបស់រដ្ឋ ដោយត្រូវរក្សាទុកដី បឹងទាំងនោះ ទុកជាសម្បត្តិសាធារណៈចំនួនប្រហែល៤០០ហិចតា និងបន្តដល់អាងទឹកយុវជនប្រហែល១០០ហិចតា ដែលជនមួយចំនួនបានបោះចូលធ្វើឲ្យអាជ្ញាធរឈឺក្បាល។
បើតាមអភិបាលស្រុកស្អាង ករណីនេះធ្វើឲ្យប៉ះពាល់ដល់ អ្នករំលោភកាន់កាប់ទាំងនោះមិនសប្បាយចិត្ត រួចបានប្រើគ្រប់វិធីរិះគុណអាជ្ញាធរ ទាំងមិនសមហេតុផលផ្សេងៗ ដល់អាជ្ញាធរសមត្ថកិច្ចពាក់ព័ន្ធ ដែលបានការអនុវត្កលើការងារនេះ។
ដោយឡែក ប្រជានេសាទនៅស្រុកស្អាង មានការសប្បាយចិត្ត និងសាទរដល់អាជ្ញាធរដែលបានយកចិត្តទុកដាក់ ដល់ពួកគាត់ជាអ្នកប្រកបបរបរនេសាទនោះ ព្រោះបឹងរដ្ឋ គឺជាអាយុជីវិតរបស់ពួកគាត់បើសិនជាបាត់បង់ទៅ គឺជីវិតគ្រួសារគាត់មូលត្រូវប្រឈមបញ្ហាជាច្រើនផងដែរ កូនៗអាចឈប់ពីការសិក្សា ឬក៏ឈានទៅធ្វើជាពលករឆ្លងដែន។
បន្ថែមពីនេះប្រជានេសាទ បានសំណូមពរដល់រដ្ឋបាលស្រុក មេត្តាជួយបន្តចុះទៅកំណត់ដែនបឹងរដ្ឋមួយចំនួនទៀត ដែលនៅសេសសល់ ដែលក្រុមឈ្មួញខិលខូច កំពុងទន្ទ្រានកាន់កាប់នោះ៕
