(កំពង់ចាម)៖ កម្លាំងសមត្ថកិច្ចចម្រុះខេត្តកំពង់ចាម រួមមាន សហគមន៍នេសាទ, ខណ្ឌរដ្ឋបាលជលផល និងអាជ្ញាធរមូលដ្ឋាន ក្រោមការបញ្ជាពីលោក ហួត វុទ្ធី ព្រះរាជអាជ្ញាអមសាលាដំបូងខេត្ត នៅថ្ងៃទី២៨ ខែសីហា ឆ្នាំ២០១៨នេះ បានបន្ដប្រតិបត្តិការបង្ក្រាបបទល្មើសនេសាទខុសច្បាប់ នៅក្នុងមូលដ្ឋានស្រុកព្រៃឈរ និងស្រុកបាធាយ។
ស្នងការនគរបាលខេត្តកំពង់ចាម លោកឧត្តមសេនីយ៍ទោ ឯម កុសល បានឲ្យដឹងថា ប្រតិបត្តិការនៅទីតាំងទី១៖ លោក បានបញ្ជាអធិការនគរបាលស្រុកព្រៃឈរ សហការជាមួយប៉ុស្តិ៍នគរបាលរដ្ឋបាលមៀន លោកមេឃុំមៀន, ក្រុមប្រឹក្សាឃុំមៀន, សហគមន៍នេសាទឃុំមៀន ចុះបង្រ្កាបបទល្មើសនេសាទខុសច្បាប់ នៅចំណុចជ្រោយកេះ កោះចេ ទំនប់អេងលី ចំណុចខាងត្បូងភូមិទួលព្រិច និងបឹងធំ ឃុំមៀន ស្រុកព្រៃឈរ។
ជាលទ្ធផល រួមមាន លូស្បៃមុងចំនួន២៥មាត់, ព្រួលស្បៃមុងប្រវែង១,២៥០ម៉ែត្រ, បង្គោលចម្រឹង ចំនួន៣៧៥ដើម និងចាក់លែងកូនត្រីចម្រុះចំនួន១៤៥គីឡូក្រាម ចូលក្នុងបឹងធម្មជាតិវិញ។ចំពោះឧបករណ៍សម្ភារខាងលើ ត្រូវបានក្រុមការងារកាប់បំផ្លាញចោលនៅនិងកន្លែង។
បើតាមលោកឧត្តមសេនីយ៍ស្នងការ ប្រតិបត្តិការនៅទីតាំងទី២៖ លោកបានបញ្ជាឲ្យកម្លាំងជំនាញការិយាល័យនគរបាលប្រឆាំងបទល្មើសសេដ្ឋកិច្ចខេត្ត សហការជាមួយ កម្លាំងអធិការដ្ឋាននគរបាលស្រុកបាធាយ និងខណ្ឌរដ្ឋបាលជលផលខេត្តកំពង់ចាម ចុះបង្រ្កាបបទល្មើសនេសាទខុសច្បាប់នៅចំណុច ភូមិសាស្រ្ត ឃុំត្រប់ បឹងស្រះហីង និងទំនប់ត្រពាំងប្រលិត ស្រុកបាធាយ ខេត្តកំពង់ចាម។
ជាលទ្ធផល ដកហូតបាន លូស្បៃមុងចំនួន៥២មាត់, របាំងស្បៃមុង ប្រវែង២,៨៥០ម៉ែត្រ, ឧបករណ៍រ៉ាវចំនួន២១មាត់, របាំងរ៉ាវប្រវែង១,២៥០ម៉ែត្រ
, បង្គោលចម្រឹង ចំនួន១,១៧០ដើម និងចាក់លែងកូនត្រីចម្រុះ ចំនួន១១៤គីឡូក្រាម។ ចំពោះសម្ភារឧបករណ៍ល្មើសច្បាប់ទាំងអស់ បានដុតកំទេចចោល នៅចំណុចទួលឬស្សីច្រាញ ឃុំត្រប់ ដោយមានការឯកភាពពីលោកព្រះរាជអាជ្ញាអមសាលាដំបូងខេត្តកំពង់ចាម៕
