គ្រូៗដែលចូលកែកិច្ចការរបស់បេក្ខជនប្រឡងបាក់ឌុប ត្រូវបានដកហូតទុកនូវកាបូប ទូរស័ព្ទដៃ និងសម្ភារមួយចំនួន
24-08-2018 12:27
(ភ្នំពេញ)៖ គណៈកម្មការគ្រប់មុខវិជ្ជា នៅគ្រប់មណ្ឌលកំណែមុខវិជ្ជាទាំង១០ កំពុងតែមមាញឹកបំពេញការងារតាមភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់ ដើម្បីធានាឲ្យការប្រឡង សញ្ញាបត្រមធ្យមសិក្សាទុតិយភូមិ ប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
ដោយឡែក សម្រាប់គ្រូៗ ដែលត្រូវបំពេញភារកិច្ចកែនូវវិញ្ញាសារប្រឡងទាំងអស់នេះ មុននឹងចូលទៅក្នុងបន្ទប់ប្រឡង ក៏ត្រូវគណៈកម្មការធ្វើការដកហូត កាបូប ទូរស័ព្ទដៃ និងសម្ភារមួយចំនួនផងដែរ ដើម្បីផ្ដល់ភាពសុក្រឹត្យ ត្រឹមត្រូវ និងតម្លាភាពដល់គ្រប់បេក្ខជនទាំងអស់។ នេះបើតាមការឲ្យដឹងពី ក្រសួងអប់រំ យុវជន និងកីឡា ដែលបានបង្ហោះនៅលើ Facebook ផ្លូវការនៅព្រឹកថ្ងៃទី២៤ ខែសីហា ឆ្នាំ២០១៨។
ក្រសួងអប់រំ បញ្ជាក់យ៉ាងដូច្នេះថា «កាបូប ទូរស័ព្ទ និងសម្ភារផ្សេងៗ ដែលសមាជិក នៃគណៈកម្មការក្រុមមុខវិជ្ជា នៅគ្រប់មណ្ឌលកំណែមុខវិជ្ជាទាំង១០ យកមកជាប់ខ្លួនត្រូវបានរក្សាទុកដាច់ដោយឡែក ខណៈកំពុងមានភាពមមាញឹកក្នុងការបំពេញការងារតាមភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់ ដើម្បីធានាឲ្យការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ២០ សីហា ២០១៨ ប្រព្រឹត្តទៅដោយគោរព តាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន»។
សូមជម្រាបថា លទ្ធផលប្រឡងនឹងត្រូវប្រកាស នៅតាមមណ្ឌលប្រឡងក្នុងរាជធានីភ្នំពេញ និងខេត្តកណ្ដាល នារសៀលថ្ងៃទី១១ ខែកញ្ញា ឆ្នាំ២០១៨ និងនៅតាមមណ្ឌលប្រឡងក្នុងខេត្តផ្សេងទៀត នាថ្ងៃទី១២ ខែកញ្ញា ឆ្នាំ២០១៨ ព្រមទាំងផ្សព្វផ្សាយតាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡា។
ការប្រឡងសម្រាប់ឆ្នាំសិក្សា២០១៨នេះ មានបេក្ខជនបានចុះឈ្មោះប្រឡងសរុបចំនួន១១៥,២៦៨នាក់ ស្រី៥៨,១៥៨ នាក់ និងមានមណ្ឌលប្រឡងចំនួន ១៩៦មណ្ឌល ក្នុងនោះថ្នាក់វិទ្យាសាស្ត្រ មាន៩៩មណ្ឌល និងថ្នាក់វិទ្យាសាស្ត្រសង្គមមាន៩៧មណ្ឌល ត្រូវជា៤,៦៥៥បន្ទប់ ទូទាំងប្រទេស៕
