(ព្រះសីហនុ)៖ ស្របពេលដែលខេត្តព្រះសីហនុ មានការអភិវឌ្ឍយ៉ាងគំហុក ក្នុងរយៈកាល២ឆ្នាំចុងក្រោយនេះ បញ្ហាផ្លូវក្នុងក្រុងស្ទើរគ្រប់កន្លែង ក៏កំពុងតែខូចខាតយ៉ាងដំណំ ធ្វើឲ្យប្រជាពលរដ្ឋមួយចំនួន មានការរអ៊ូរទាំ និងរិះគន់ធ្ងន់ៗ តាមបណ្តាញសង្គមផងដែរ។

ទន្ទឹមនេះអាជ្ញាធរក្រុង-ខេត្តព្រះសីហនុ និងមន្ទីរសាធារណការ និងដឹកជញ្ជូនខេត្តព្រះសីហនុ ក៏កំពុងតែមានក្តីកង្វល់យ៉ាងខ្លាំង និងបានជួបប្រជុំពិភាក្សាគ្នារកដំណោះស្រាយជាបន្តបន្ទាប់។
កង្វល់ខ្លាំងដោយសារទំហំ នៃការខូចខាតធំធេងពេកហើយការចំណាយថវិកាជួសជុល ក៏មានទំហំធំសម្បើម ខណៈខ្ទង់ថវិកាក្នុ្ងងការជួសជុលឡើងវិញនៅមានកម្រិត។ ជារៀងរាល់ថ្ងៃ បើទោះជាមានភ្លៀងធ្លាក់មិនឈប់ឈរ ក៏ក្រុមការងារបានធ្វើសកម្មភាពជួលជុលទាំងហាលភ្លៀងហាលខ្យល់ ទោះណាជាមិនអាចបំពេញចិត្តអ្នកប្រើប្រាស់ផ្លូវថ្នល់បានជាទីគាប់ចិត្តក្តី។

ទាក់ទងនឹងបញ្ហានេះ លោក យន្ត មីន អភិបាល នៃគណៈអភិបាលខេត្តព្រះសីហនុ បានថ្លែងថា ចំពោះមុខនេះលោកបានជម្រុញឲ្យមន្ទីរសាធារណការ ជួសជុលបន្ទាន់ជាលក្ខណៈបណ្តោះអាសន្នសិន ដើម្បីឲ្យពលរដ្ឋអាចធ្វើចរាចរណ៍បាន។ នៅពេលរាំងភ្លៀងនឹងរៀបចំជួសជុលឡើងវិញទៀត ព្រោះពេលនេះភ្លៀងសើមជោគជាំពេកមិនអាចធ្វើកើត សូមឲ្យសាធារណជនមានការយោគយល់។

ជាមួយនេះ លោកអភិបាលខេត្ត ក៏ទទួលស្គាល់ចំពោះការរិះគន់ដើម្បីស្ថាបនារបស់ពលរដ្ឋ តែក្នុងនោះមានបុគ្គលខ្លះ បានរិះគន់ដោយមានចរិតវាយប្រហារតាមមនោគតិទុច្ចរិត ទាំងមិនបានយល់ច្បាស់អំពីស្ថានភាពជាក់ស្តែងនៅខេត្តព្រះសីហនុ គ្រានេះមានភ្លៀងធ្លាក់ខ្លាំងស្ទើររាល់ថ្ងៃ ហើយអ្នកបច្ចេកទេស មិនអាចធ្វើការជួសជុលឲ្យមានគុណភាពបានទេ។

លោក ណុប ហេង ប្រធានមន្ទីរសាធារណការ និងដឹកជញ្ជូន ខេត្តព្រះសីហនុ បានបញ្ជក់ថា មូលហេតុនាំឲ្យផ្លូវខូចស្ទើរគ្រប់កន្លែងបែបនេះណ្តាលមកពីមូលហេតុ៖

ទី១៖ ផ្លូវចាស់មានអាយុកាលជាង១០ឆ្នាំទៅហើយ វាដល់អាយុកាលត្រូវធ្វើឡើងវិញទាំងអស់
ទី២៖ ឆ្នាំនេះមានភ្លៀងធ្លាក់ឥតឈប់ធ្វើឲ្យផ្លូវកាន់តែពុកផុយដូចក្រណាត់ចាស់អញ្ចឹង
ទី៣៖ ខេត្តព្រះសីហនុមានការអភិវឌ្ឍគំហុកពេក ការដឹកជញ្ជូនក៏កើនគំហុកទាំងយប់ទាំងថ្ងៃ ទាំងដឹកគ្រឿងសំណង់ ដឹកដី ដឹកបេតុង ជាដើម ហើយដឹកធ្ងន់ទៀតផង។

លោក ណុប ហេង បន្ថែមថា តាមការប៉ាន់ប្រមាណផ្លូវក្នុងក្រុងព្រះសីហនុ ដើម្បីធ្វើឲ្យល្អឡើងវិញត្រូវការថវិកាច្រើនណាស់ រហូតខ្ទង់លានដុល្លារ។ ចំពោះថវិការបស់ខេត្តនៅមានកម្រិត មិនអាចធានាការជួសជុលបានទាំងអស់ឡើយ។ ដើម្បីដោះស្រាយបញ្ហានេះបាន លោក ណុប ហេង យល់ឃើញថា មានតែថ្នាក់ជាតិ គឺរាជរដ្ឋាភិបាលប៉ុណ្ណោះទើបអាចដោះបាន។
តែសព្វថ្ងៃនេះ មន្ទីរក៏បានធ្វើការជួសជុលជាលក្ខណៈបណ្តោះអាសន្នប៉ុណ្ណោះ។

ការធ្វើរាល់ថ្ងៃទាំងហាលភ្លៀងបែបនេះ មិនអាចធានាគុណភាពប្រើប្រាស់បានយូរអង្វែងឡើយ គ្រាន់តែដោះបញ្ហាចំពោះមុខប៉ុណ្ណោះ។ ទោះជាបែបនេះក្តី លោក យន្ត មីន បានបង្ហាញជំហរថា នឹងខិតខំដោះស្រាយ ស្តារ និងកែលម្អរឲ្យបានប្រសើរឡើងវិញនៅពេលខាងមុខនេះ៕