(ពោធិ៍សាត់)៖ គំនរឈើលេខ១ប្រមាណ២០ម៉ែត្រគូប ដែលគេបានប្រទះឃើញ នៅចំណុចតាំងយ៉ខាងត្បូង ផ្លូវជាតិលេខ៥៥ ប្រមាណ៣០០ម៉ែត្រ ស្ថិតនៅក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ ត្រូវបានកម្លាំងអាវុធហត្ថលើផ្ទៃប្រទេស ចុះទៅបង្ក្រាប។
ការចុះបង្ក្រាបនេះ បានធ្វើឡើងបន្ទាប់ពីបងប្អូន និងមិត្តៗ អ្នកសារព័ត៌មានបានរាយការណ៍ និងចុះផ្សាយថ្ងៃទី១៤-១៥ ខែសីហា ឆ្នាំ២០១៨។
ជាក់ស្ដែងនៅថ្ងៃទី១៩ ខែសីហា ឆ្នាំ២០១៨ កម្លាំងសមត្ថកិច្ចចម្រុះដឹកនាំដោយលោកវរសេនីយ៍ឯក អូ សុផារ៉ា, លោកវរសេនីយ៍ត្រី ប៊ុក ប៊ុនឈឿន ជាកម្លាំងកងរាជអាវុធហត្ថស្រុកវាលវែង បានសហការ និងមន្ត្រីបរិស្ថានជាច្រើននាក់ បានចុះបង្ក្រាបទីតាំងឈ្មួញលាក់ទុកឈើអត់ច្បាប់ បានចំនួន២៨០ដុំ ជាប្រភេទឈើ សុក្រំ គរគី និងកកោះ ដែលក្រុមឈ្មួញបានដឹកលាក់ទុកនៅទីតាំងខាងលើ គ្រោងដឹកបន្ត ចេញទៅលក់នៅភ្នំពេញ។
ឈើទាំងនេះ បានប្រគល់ជូនមន្ត្រីបរិស្ថានដឹកយកទៅរក្សាទុក នៅទីស្នាក់ការការពារសត្វព្រៃភ្នំសំកុះ ដើម្បីកសាងសំណុំរឿង ចាត់វិធានការតាមនីតិវិធី៕
