(ភ្នំពេញ)៖ នៅរសៀលថ្ងៃទី១ ដែលជាថ្ងៃដំបូងការប្រឡងមធ្យមសិក្សាទុតិយភូមិបានផ្ដើមបន្ដទៀតហើយ នៅវេលាម៉ោង២រសៀល ដោយថ្នាក់វិទ្យាសាស្ដ្រ ប្រឡងមុខវិជ្ជា គីមី និងអង់គ្លេស រីឯថ្នាក់សង្គម ប្រឡងមុខវិជ្ជា ភូមិ និងអង់គ្លេស។ នេះបើតាមកាលវិភាគដំណើរការប្រឡង។
ដំណើរការប្រឡងនៅរសៀលនេះ ក៏មិនខុសពីពេលព្រឹកប៉ុន្មាននោះទេ ដោយមុនពេលបេក្ខជនចូលក្នុងមណ្ឌល និងបន្ទប់ប្រឡង គណៈកម្មការអនុរក្ស មន្ត្រីអ្នកសង្កេតការណ៍ស្ម័គ្រចិត្តអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា បានឆែករកសំណៅឯកសារ និងឧបករណ៍អេឡិចត្រូនិក គ្រប់ប្រភេទពីបេក្ខជនផងដែរ។
សូមជម្រាបថា ដំណើរការសំណេរនាថ្ងៃទី១នេះ មានបេក្ខជនប្រឡងសរុប ចំនួន ១១៥,២៦៨នាក់ ស្រី៥៨,១៥៨នាក់ អវត្តមានសរុបចំនួន ១,៧០៨នាក់ ស្រី៦៩២នាក់។
បេក្ខជនប្រព្រឹត្តកំហុសឆ្គង មានចំនួន ០៤ករណី ក្នុងនោះករណីដកហូតទូរស័ព្ទដៃ០៣ករណី និងនាំសំណៅឯកសារចូលចំនួន ០១ករណី ដោយឡែកមានបេក្ខជនមានបញ្ហាសុខភាពធ្ងន់ធ្ងរចំនួន ១១ករណី ប៉ុន្តែអាចដំណើរការប្រឡងបន្តរហូតចប់ បន្ទាប់ពីទទួលបានការសង្គ្រោះបឋម ករណីបេក្ខជនគ្រោះថ្នាក់ចរាចរចំនួន ០១ករណី និងមាន ០១ករណី ត្រូវបានបញ្ជូនទៅព្យាបាលនៅមន្ទីរពេទ្យ និងពុំអាចត្រឡប់មកបន្តការប្រឡងបាន។
បុគ្គលិកអប់រំមានកំហុសឆ្គង ០១ករណី (ប្រើទូរស័ព្ទ) ត្រូវបានបញ្ឈប់មិនអនុញ្ញាតឲ្យបន្តការងារ។ មណ្ឌលមួយចំនួននាពេលព្រឹកនេះ មានភ្លៀងធ្លាក់នៅខេត្តកោះកុង ខេត្តកែប ខេត្តតាកែវ និងខេត្តក្រចេះ ប៉ុន្តែមិនប៉ះពាល់ដល់ដំណើរការសំណេររបស់បេក្ខជនឡើយ។ នេះបើតាមការឲ្យដឹងពីទំព័រ Facebook ផ្លូវការរបស់ក្រសួងអប់រំ យុវជន និងកីឡា៕
