(ស្វាយរៀង)៖ លោក ជៀង អំ អនុប្រធានក្រុមការងារថ្នាក់ជាតិ ចុះជួយខេត្តស្វាយរៀង នៅព្រឹកថ្ងៃទី១៩ ខែសីហា ឆ្នាំ២០១៨នេះ បានចុះជួបសំណេះសំណាល និងសម្តែងនូវការដឹងគុណចំពោះម្ចាស់ឆ្នោត នៅតាមភូមិនីមួយៗ នៃឃុំពងទឹក ស្រុករំដួល ខេត្ដស្វាយរៀង។ ពិធីនេះ ក៏មានការចូលរួមពីអស់លោក-លោកស្រី ជាប្រធាន អនុប្រធាន ក្រុមការងារ ចុះតាមភូមិ និងសមាជិក-សមាជិកាបក្សជាង ៣០០នាក់ផងដែរ។
លោក ជៀង អំ បានថ្លែងអំណរគុណ ដល់ប្រជាពលរដ្ឋទាំងអស់ ដែលបន្តផ្តល់សេចក្តីទុកចិត្ត មកលើគណបក្សប្រជាជនកម្ពុជា។ លោកបានបញ្ជាក់ថា ជោគជ័យរបស់គណបក្សប្រជាជនកម្ពុជា គឺជាជោគជ័យ របស់ប្រជាពលរដ្ឋគ្រប់គ្នា ក្នុងការការពារថែរក្សាសន្តិភាព និងការអភិវឌ្ឍជាតិទៅមុខទៀត ក្រោមការដឹកនាំដ៏ឈ្លាសវៃ របស់សម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណបក្សប្រជាជនកម្ពុជា។
នៅក្នុងឱកាសនោះ លោក ជៀង អំ ក៏បានជំរុញដល់សមាជិក-សមាជិកាបក្សទាំងអស់ បន្តគាំទ្រគណបក្សប្រជាជនកម្ពុជា គ្រប់អាណត្តិបន្តទៀត ជាពិសេសគាំទ្រសម្តេចតេជោ ហ៊ុន សែន ធ្វើជានាយករដ្ឋមន្ត្រី។
សូមបញ្ជាក់ថា នៅក្នុងសំណេះសំណាលនេះ ក៏មានពិសារបាយសាមគ្គីមួយពេលយ៉ាងសប្បាយរីករាយផងដែរ៕
