(ភ្នំពេញ)៖ ក្រុមខារ៉ាកម្ពុជាបន្តឈរលើលេខ១ដដែល បើទោះបីមានបញ្ហាបច្ចេកទេសច្រើនក៏ដោយ ដូចជាបញ្ជារថយន្តដោយគ្មានហ្វាំង ធ្លាក់ផ្លូវ បែកកង់ និងជាប់ផុងជាដើម។ នេះជាការបញ្ជាក់របស់កីឡាករ ហូ សិទ្ធិគុណ ក្រោយបញ្ចប់ការប្រកួតក្នុងថ្ងៃទី២ ដោយធ្វើឡើងតែមួយជុំប៉ុណ្ណោះ។

ដោយឡែកកីឡាការិនី សេង សុជាតិតា ជំនួយការអ្នកបើកបរ បានអះអាងថា នាងនឹងពិភាក្សាជាមួយ ជំនួយការអ្នកបើកបរមួួយរូបទៀតកីឡាករ ពៅ តិចឡេង ឱ្យបានល្អដើម្បីដណ្តើមជ័យជម្នះឱ្យបាន ក្នុងព្រឹត្តការណ៍ប្រណាំងរថយន្តឆ្លងកាត់ឧបសគ្គកម្រិតអាស៊ី ឆ្នាំ២០១៨នេះជូនកម្ពុជា។

គួរជម្រាបថា​ ព្រឹត្តិការណ៍ Asia Cross Country Rally​ 2018​ នេះ ជាព្រឹត្តិការណ៍ប្រកួតយានយន្តអន្តរជាតិលើកទី២៣​ ប្រចាំតំបន់អាស៊ី។​ ព្រឹត្តិការណ៍នេះ​ បានចាប់ផ្ដើមពីខេត្តប្រាជិនបុរី​ ប្រទេសថៃ នាថ្ងៃទី១៣​ ខែសីហា និងបញ្ចប់នៅរាជធានីភ្នំពេញ​ ប្រទេសកម្ពុជា នាល្ងាចថ្ងៃទី១៨​ ខែសីហា ឆ្នាំ២០១៨នេះ។

សម្រាប់លទ្ធផលប្រណាំងថ្ងៃទី២នៅកម្ពុជា ប្រភេទរថយន្តសាំង កីឡាករ ហូ សិទ្ធគុណ បន្តឈរលេខ១ ខណៈលេខ២ កីឡាករជប៉ុន SATOCHI TAKENO លេខ៣កីឡាករជប៉ុនដែរ SHINOCHI MORITA រីឯប្រភេទរថយន្តម៉ាស៊ូត លេខ១ដល់៣ សុទ្ធតែជាកីឡាករថៃ។

សូមបញ្ជាក់ដែរថា ក្រុមប្រណាំងខារ៉ាកម្ពុជាដែលចូលរួមក្នុងនៃព្រឹត្តិការណ៍ Asia Cross Country Rally 2018 ទទួលបានការឧបត្ថម្ភធំពីភេសជ្ជៈ Zorus៕